Test
حضرنا) ...ولم نجدكم
< لما يكون ما عندكم موضوع.
< وما عندك (رصيد).
< تلاقي ليك زول في (الشارع).
< تشبهو.
< يشبهك.
< حكاية (الشبه) دا طبعا بنتج من عدم الموضوع.
< الزول يوقفك ..او توقفو ...ما فارق.
< المهم بتحاول تشوف ليك حوار داخلي.
< الايامات دي أي زول بتكلم ليك عن (الانفصال).
< الفاهم شيء ...والما فاهم.
< أي زول بتكلم عن (الانفصال).
< والبترول ...وسيخ المريخ.
< واهدافهم العكسية.
< تصوروا مدافعين المريخ سجلوا في شباك الحضري ..اكتر من الاهداف التي سجلها هجوم الاندية التي بارت المريخ.
< وارقص ..ارقص يا حضري.
< الاعلام السالب من يمسك ليهو في حاجة (بكجها).
< هسه تلقو مامون ابوشيبة رجع يكتب عن (ضربة جزاء) سنة 1996 م ارتكبت مع عبدالمجيد جعفر.
< وسلك بكون رجع يكتب عن (الطابق التاني).
< وجعفر سليمان بكتب عن (النجيلة).
< يلا تاني ما اشوف لي واحد فيكم بكتب عن (الكورة).
< شوفوا المنشآت.
< ركزوا في (الاضاءة).
< افضل ليكم.
< نرجع للزول البلاقيك ...وبتشبهو.
< كل واحد يقعد يشبه في التاني.
< عدم موضوع كدا.
< تقوم تقول للزول المعاك : انا الزول دا شايفو وين؟.
< ما غريب عليّ.
< انا متأكد اني شفتو في حتة.
< العيون المتل شباك (التكل) ديل ..ما غريبات عليّ.
< (النخرين) ديل ...انا شايفن في مناسبة.
< لا ..ابدا ..ما غريبات عليّ.
< يا ربي اكون شايف الزول دا في الجامعة.
< في عطبرة.
< عطبرة هسه الدخلها هنا شنو؟.
< يا ربي اكون شفتو في (الصين)...رغم اني ما مشيت الصين.
< لكن قالوا ناس الصين بتشابهو.
< الصيني ما بتفرزو من الصيني ..إلا بالقرعة.
< قرعة.
< وإلا ضربات ترجيحية.
< واحد عمل ليهو عزومة...عزم الصينيين المعاهو في الشغل.
< الصينيين كلهم جوهو ..ما قصروا معاه.
< زوجة الزول دا شفات الصينيين يدخلو ويطلعوا ...قالت لي زوجها ..انت تعال هنا : دا شنو الصيني الجاك عشرة مرات.
< طبعا ...هسه ما في أي كلام عن (سيكافا).
< ولا ح اتحدث ليكم عن (الحضري).
< ح عمل فيها ما عارف.
< زي ناسي كدا.
< بترواح ليكم من الكلام.
< هي سيكافا دي المريخ مشارك فيها.
< نرجع ليكم.
< قبيل قلنا ليكم..سيكافا دي ما بطولة.
< قعدتوا تقولوا لينا نحن عاوزنها (اعداد).
< عليكم الله هسه استفدتوا شنو من سيكافا دي غير (الاهداف العكسية).
< الباشا فقد الثقة في نفسو.
< ومصعب عمر.
< وسعيد السعودي.
< والحضري ذاتو مع (التقدم في العمر) فقد الثقة.
< بقت تدخل فيهو اقوان غريبة.
< انتوا ما شفتوا الحضري.
< هسه عليكم الله ...الحضري دا فرقو من اكرم الهادي سليم شنو؟.
< الفرق 15 سنة.
< الحضري بقي يمسك الكورة ويفكها.
< حالتو دي دافعين ليك (الغرامة).
< يمين غرامتك دي لو دفعوها في (موسي الزومة) يبقي احسن حارس في افريقيا.
< طيب لو ما دفعوا ليك الغرامة ...كنت عملت شنو؟.
< الغريب في الضربات الترجيحية....الحضري بقي يكون في جهة والكورة في جهة.
< زي الزول البقولوا ليهو في الامتحان (لا تكتب في الهامش).
< يقوم الزول يكتب.
< الحضري يمشي يمين.
< الكورة تكون شمال.
< الكورة تكون يمين.
< الحضري بمشي شمال.
< يا الحضري انت كبرت عديل.
< الكبر حصل.
< انا وقت شفت الحضري بمسك ويفك في الكورة ...ما عرفتو.
< ساعة وانا بقول : الزول دا انا شفتو وين؟.
< لو ما (الغرامة) ما كنت عرفتو.
< بالحساب.
< الحضري دا طلع المريخ من كل البطولات.
< كل المباريات عندما تبقي عليهو ...الحضري بجي ويخزل فيه الناس.
< الحضري خزل المريخ في بطولة الاندية الافريقية.
< وقت الموضوع بقي على الحضري ..وجاءت الضربات الترجيحية ...الحضري فشل.
< انت يا زول جايبنك لي شنو؟.
< دافعين ليك الغرامة.
< وعمرك 40 سنة.
< وعربية...وشقة.
< ومرتب كبير...وتشاكل زي ما عاوز في ناس (السعودي).
< وبرضو فشلت في الضربات الترجيحية.
< الحضري فشل حتي على المحافظة على (العلامة الكاملة).
< جاء وخرب (السجل).
< الحضري بعد دا مشي سيكافا.
< في اسهل من سيكافا.
< سيكافا دي الناس بيلعبوا فيها الي الان بالسروال الطويل.
< المدافع تلقي لاعب بي فردة كدارة.
< البشوت يمين ..بلبس فردة يمين.
< والبشوت شمال ..بلبس فردة شمال.
< والفردة ذاتها بلبسوها بدون (جوارب).
< شربات يعني.
< شربات شنو؟.
< هسه دا وقتو.
< المريخ طار.
< 7 اجانب.
< وحارس مرمي عمرو 40 سنة.
< جمال الوالي دفع ليهو الغرامة.
< اهلو ما قدرو يدفعوها ليهو.
< جمال الوالي دفعها ليهو.
< وجهاز فني مصري.
< وطابق تاني.
< و150 الف دولار دفعوها للجنة المنظمة لسيكافا....تبرع.
< 150 الف دولار ..تتطوع ساكت.
< وبرضو (طاروا).
< فريق فيه 7 اجانب.
< الحضري.
< باسكال.
< الدافي.
< سكواها.
< كلتشي.
< وارغو.
< اديكو.
< وبرضو طاروا من (سيكافا).
< انتو سيمبا دا لو قابلكم في (ركشة) بطيركم.
< جمال الوالي للطيران.
< يعمل ليكم شنو يا موسي الزومة.
< دولار ..ما قصر معاكم فيهو.
< اسمنت ...عداهو العيب.
< سيخ ...ما في زول بقدر يقول فيهو حاجة.
< طوب ..رقدوا ليكم زي (الواطة).
< مدرب اجنبي...ما خلي ليكم حاجة.
< مرة برازيلي..ومرة الماني ..ومرة مصري ..ومرة سوداني.
< انتوا شكلكم كدا يا موسي الزومة ما بنفع معاكم غير مازدا.
< مفروض ما يجيبوا ليكم اكتر من مازدا.
< انت تعال هنا.
< من الصباح ماسك لينا ...موسي الزومة ..موسي الزومة.
< هسه موسي الزومة ذنبو شنو؟.
< انت ما بتشوف في (اديكو).
< محترف زي اغنية (في الليلة ديك).
< العلاقة واضحة.
< ما عاوز اشرح.
< شوفوا نهاية الجملة.
< دا جايبنو من وين؟.
< الزول دا قلت ليكم مازال الي الان متأثر من (احداث ليبيا).
< لاعب المباراة كلها عامل ساتر.
< والعجب وارغو.
< دخلو في اخر خمسة دقائق ...نفسو اتقطع.
< انا وقت شفتو قبل الضربات الترجيحية افتكرتو (بلة جابر).
< عشان بلة جابر جري كتير.
< في المريخ دا في حاجات غريبة بتحصل.
< المدافعين يسجلوا.
< والمهاجمين يضيعو.
< كلتشي ضيّع.
< وسكواها ضيّع.
< والباشا جاب.
< الباشا دي طبعا أي شبكة يشوفها بجيب فيها ..ما فارقة معاهو.
< في الحضري ...في غير الحضري ...ما فارقة معاهو.
< المهم يسجل.
< قالوا ليك ...الباشا بعد ما سجل في شبكتو في المباراة الاولي ...المدرب حسام البدري سألو ...قال ليهو : انت ليه بتسجل في شبكتك.
< الباشا قال للمدرب : عندي باقي قروش جمال الوالي ما اداني ليها.
< طيب انت يا الباشا ...وقت جمال ما اداك القروش ...الحضري ذنبو شنو؟.
< الزول دا عندو سمعة خايف عليها.
< عاوز تاني يحترف في اوروبا.
< الباشا عرفناهو بي سببو.
< سعيد السعودي ليه سجل في الحضري.
< انتوا ما عارفين السبب.
< قالوا سعيد السعودي مختلف مع الحضري.
< من يوم ابوجريشة جاب (التورتة) للحضري ...السعودي الكلام دا ما عاجبو.
< قالوا ليك السعودي حالف على (الحضري).
< طيب مصعب عمر مشكلتو شنو؟.
< مصعب ما عندو مشكلة ...بس شوية (الاضاءة) غلطت معاهو.
< اضاءة شنو كمان.
< هسه الاضاءة دخلها شنو؟.
< دا زي الزول المشي للدكتور...وقال ليهو والله يا دكتور ..كل ما اكل لي (ملوخية) بتغلط عليّ.
< الدكتور قال ليهو : خلاص ما تاكل ملوخية.
< بسيطة.
< صاحبكم قال للدكتور : لو ما اكلتها بغلط عليّ المدام.
< زولكم ما قادر يقول حاجة.
< انتوا مالكم عاوزين تتطلعوني من (سيكافا).
< عملت ليكم شنو انا؟.
< تذكر.
< تذكر شنو كمان؟.
< مالك انت زي الزول النساي.
< زول نساي شديد.
< الضرس حامي النوم.
< ضرسو ينتح زي (الاستوب).
< زي كلب الحراسة.
< الليل كلو ينبح.
< الزول دا مشي يشكي من ضرسو لطبيب الاسنان.
< حجز نمرتو.
< وقطع تذكرتو.
< ومسك خشمو ..ودخل على الدكتور.
< الدكتور قال ليهو : مالك.
< نسي.
< نسي يقول ليهو : ضرسي.
< قال للدكتور : انا جيت هنا ليه؟.
< نسيت.
< عليك الله انت داخل ليك علي دكتور اسنان ..بتكون داخل ليهو عشان تشيل منو صرفة الصندوق.
< طبيعي تكون داخل علي طبيب اسنان ...وقاطع تذكرة ...طبيعي تكون بتشكي من الضرس.
< الحكاية دي ..زي حكاية تانية.
< واحد مسجون في السجن ليهو 5 سنوات.
< في السنة السادسة شاف ليك جارو في السجن.
< مشي عليهو ..قال ليهو : انت الجابك هنا شنو ؟...انت موش كنت (شريف)...وما بتاكل حق الناس.
< السجين الجديد قال ليهو : يعني بكون جيت هنا (طرد).
< مجرم وقطيم كمان.
< نمشي على سيكافا.
< المريخاب ديل عملوا أي حاجة.
< في عهد جمال الوالي غير كاس الممتاز مرة واحدة ما فازوا بي أي حاجة.
< 8 سنوات ..كأس الممتاز مرة واحدة.
< سيكافا فشلوا يفوزوا بيها.
< سيكافا ذاتها مع جمال الوالي بقت كتيرة عليك.
< الدولة دعمت المريخ بـ (مليون دولار) عشان ينظم سيكافا.
< نظموا سيكافا.
< واختار المريخ الفرق المشاركة في البطولة ...(اشترطوا في المشاركة ان تكون الاندية المشاركة في البطولة من ذوات (الحمام).
< يعني الفريق يكون حمام.
< وجابوا حكام البطولة.
< مع هذا ...المريخ لم يفز بكأس البطولة.
< رغم ان البطولة كانت منظمة في الخرطوم.
< المريخ طار من اتراكو.
< طار من ام درمان.
< السنة دي قالوا يغيّروا الخطة شوية ...يمشوا يشاركوا برة.
< عشان المريخ دا ما بجيب ليهو حاجة إلا من برة.
< من جوة ما بقدر يعمل حاجة.
< قالوا احسن نشيل البطولة برة.
< هنا الهلال مقطعها معانا.
< يمكن من برة نجيبها.
< دفعوا 150 الف دولار.
< عشان يضمنوا (البطولة).
< انتوا كان دفعتوا للباشا ومصعب عمر والسعودي ...كان عملتوا حاجة.
< لكن انتوا دفعتوا للجنة المنظمة.
< اللجنة المنظمة تفهمت الامر.
< واقتنعت.
< لكن البقنع الباشا والسعودي ومصعب عمر منو؟.
< الحضري دا كان كل ما يجبيو فيه قون عكسي يقعد يكورك في ناس سعيد السعودي.
< ليه وقت الحضري امس ولجت شباكه هدف (شبه عكسي).
< هدف تسبب فيه الحضري نفسه.
< ليه سعيد السعودي ما كورك في الحضري.
< شفتوا المسكنة.
< سعيد السعودي ما قدر يقول أي حاجة للحضري.
< ولا كلمة.
< رغم ان الحضري البطولة كلها بكورك في مدافعين المريخ.
< ملحوظة : ان شاءالله الحضري يستمر مع المريخ.
هوامش
< مباراة الهلال الاعدادية الاولي امام الفريق الكيني ..جعلت جماهير الهلال تطمئن على فريقها.
< الهلال مية المية.
< دي حالتها البداية.
< توريه قالوا جاب للشكافات (حول).
< واتوبونج قطع نفس الجماهير.
< مفروض الهلال يمشي لنيجيريا من اجل الانتصار على انيمبا.
< ما في حاجة بتخليكم ما تنتصروا على انيمبا.
< امير الربيع ..اضافة كبيرة للهلال.
< أي تشكيلة في الهلال اصبحت قادرة على الفوز والانتصار.
< وهذا كله بفضل اتوبونج وامير الربيع وتوريه.
< النعيم رونالدنيو دور.
< مع توريه واتوبونج ...الحضري ما برجع.
< انا خايف (العجب) ذاتو ..يتخارج.
< اديكو مهاجم المريخ اضافة حقيقة للاهلي الخرطوم.
< هسه الاهلي الخرطوم ذنبو شنو؟.
< الهلال لو عاوز ليه مهاجم اخطر من سادومبا واتوبونج ...خلوا يسجل (الباشا).
< سعيد السعودي لو وصل بالمريخ لنهائي البطولة..كان بقي هداف سيكافا.
< لو مصعب عمر لقي هيثم مصطفي (حفظه الله ورعاه) ...ما بسأل مصعب في سكواها وكلتشي.
< عاجل: غايتو يا الحضري ..كورتك بقت زي (غرامتك).