Test

ناس ضفر وبكري وعمر بخيت السنة دي مرقوا من (العيد) ومرقوا برضو من (المجموعات)....اجازة العيد يومين السنة دي ولو ما قون نزار الجماعة ديل (الجمعة) كانوا ناويين يشغّلوكم

16 يوليو 2015

من الغلاف للغلاف 

يحررها محمد عبد الماجد عند اللزوم فقط 

""""""""""""""""""""""""

 

الإهداء 

زمان ونحن شفع – لمن يكون بكرة العيد – بنفرح فرح مبالغ فيه – فرح (أوفر) شوية...

نطلع في (الحيطة)..

ونمشي نلقط (صواني الخبيز) من الحلة..

ننوم وعلى أقدامنا (الحذاء) الجديد – زي كأننا خايفين لو صبحت (الشبط) ما يطلع قدرنا...

بنخافو يصغر علينا.

زمان لمن صينية الخبيز تحرق في (الفرن) – ما بسألوا الخبّاز ولا بسألوا سيد الفرن ..بقولوا ليك : (دا كل من أضنيك الكبار ديل).

رغم أن (الأضنين) ما عندهم علاقة بالموضوع...

الغالية جداً...

في مثل هذا اليوم كنت احتاج اتعلق في (طرفك)..

محمد 

 

كورة معكوسة 

دخل ليهم في الموضوع طوالي...

ماسكاهو (عطشة) مبالغ فيها خلتو متل الترباس الما بقفل ....هو في الحالة دي قال لي صاحبو ما بتفتكر رمضان السنة دي صعب شوية؟

صاحبكم بالو في حتة تانية – قال ليه ما أصعب من (وفاق سطيف).

 

حكمة 

جلابية العيد (البيضاء) ما تخت فيها (قلم)..بضرب بضرب.

الكلام دا أنتوا لو ما عزاز عليّ ما بقولوا ليكم.

 

إجازة العيد 

قال ليه إجازة العيد السنة دي يومين ..(الأحد والاثنين) – الجمعة والسبت أصلاً إجازة.

يا زول الجماعة ديل لو ما قون نزار حامد – الجمعة كانوا ناويين يشغلوكم فيها.

غايتو الإجازة السنة دي ما فيها طريقة سفر للبلد.

الإجازة تلفونات ساكت ما بتكفي.

هسع دي (إجازة) ليكم.

 

تحذير 

أنتوا نظرتكم ما تبقى ضيقة.

لازم تنظروا لي بعيد.

قطوعات الموية ما مقصود بيها قطوعات الموية.

قطوعات الموية مقصود بيها الناس الما شغالين ديل.

ينبطحوا من ضل لي ضل...

هسع علاقة الناس ديل بي قطوعات الموية شنو؟..لو ما حركات منك ساكت.

عينكم في والي الخرطوم وتطعنوا في بله جابر.

 

أحزان كبوشية مسّخت العيد 

فقدت منطقة كبوشية أحد أنشط كوادرها – وأبر أولادها ، وأفضل شبابها وهي تفقد في الأيام الأخيرة من شهر رمضان المغفور له بإذن الله عبد العظيم عثمان العبيد ، المحامي والمستشار القانوني وأحد أعيان حي العشرة بالخرطوم والذي انتقل إلى جوار ربه وأبقى على سيرته العطرة عند كل الناس ..فقد عرف بالنخوة والكرم والشهامة.

عبد العظيم كان كتلة من النشاط والحيوية ..حتى مات بداء القلب – متعجلاً على رحيله وهو في زهو الشباب.

شارك أبناء رابطة طلاب كبوشية بجامعة القاهرة فرع الخرطوم (النيلين) إفطارهم الجماعي بمشاركة فعالة وحضور أنيق يوم الجمعة الماضية ورحل يوم الاثنين.

نسأل الله له الرحمة والمغفرة وأن يسكنه فسيح جناته ويبدله داراً خيراً من داره وأهلاً خيراً من أهله.

 

الكلمة ومعناها

أقول ليكم ...أنبوبة الغاز لو قطعت في يوم زي دا يكون (حقد) منها ساكت.

يعني الفاضى منو الليلة عشان يقعد يفتش في أنابيب الغاز.

دا ما وقت (أنبوبة غاز).

 

أول شارع 

رمضان دخل في (العضم).

ما قلنا شيء.

ولا اتكلمنا.

سكتنا ساكت.

لكن العيد دخل في (الجيب).

أخير لينا البيعصر على (العضم).

العضم ممكن ترمو بي (كباية عصير)..قطعة (فرخة) ...قطعة (باسطة).

لكن (الجيب) بترموا بي شنو؟.

 

فكرة 

ناس الارصاد (والكلام دا قاطعو من رأسي) عشان ما أخليكم تدخلوا (مراتبكم) ساكت.

ناس الارصاد قولوا ح تجي مطرة تاني أيام عيد الفطر المبارك.

قلنا ليهم دي مطرة وإلّا بنت الجيران البتجي تاني أيام العيد دا.

طبعاً (بنت الجيران) في أي حتى عندها تقلة بتعرفها براها ..العيد ما بتجي تباركو أول يوم..العيد بتباركو ليك تاني يوم.

ومرات كتيرة ما بتظهر تبارك العيد إلّا لمن الخبيز والحلاوة تكمل.

في ناس كدا غياظين شديد ..يجوكم بعد (الكعك) ما ينتهي.

تقعد تجارى من بقالة لي بقالة.

 

إسعاف 

شايل تلفونو وقع...

الظاهر اندمج في (الواتساب).

وقع هو ما التلفون.

شلناه وجري على الحوادث – وهو بين الحياة والموت...(حالتو كانت خطيرة شديدة).

في المستشفى الدكتور عاين ليه كدا ..قال ليهم ألحقوني بي (دربات) سريعة الزول دا فاقد عديل كدا.

زولكم فتح عينو ..وقال للدكتور .. إن شاء الله التلفون ما جاتو حاجة ..يا دكتور ألحقوني بـ (رصيد)..الواتساب حقي قطع ...(الدربات) خلوها هسع دي – ملحوقة...شوفوا لي شاحن جلاكسي.

 

شاحن جلاكسي 

قلت ليكم قبل كدا.

قلت ليكم الكلام دا ألف مرة – وما عاوزين تسمعوه.

في ناس من يشوفوا ليهم (كُبس) كهربة أعصابهم بتبوظ ..بقولوا عاوزين ليهم شاحن جلاكسي ..عشان تلفونهم قطع شحن.

وتلفونهم ولا بكون قاطع.

 

بالمناسبة  

مسكين عمر بخيت ..بلعب مع الهلال (12) سنة ما حصل عيّد بره البلد.

هسع عمر بخيت من أول شهرين في المريخ عيّد في (الجزائر).

عيد الجزائر كمان مسيخة مُسخ.

قالوا ليك (كعك) ما فيه.

ولا في زول بقول ليك كل سنة وأنت طيب بالعربي.

البجاملك شديد – بقولها ليك بالفرنسي.

في زول بيعيد في بلد المليون شهيد ...ديل لو عملوا عرس الشهيد ما تلقوا ليكم كرسي فاضي.

بالمناسبة ناس عمر بخيت وبكري المدينة وضفر وأمير كمال مرقوا من (العيد).

وشكلهم كدا ح يمرقوا برضو من (المجموعات).

أنتوا الزول وقت يقول ليكم الحقيقة بتزعلوا مالكم.

 

احتمال 

قاعد متل الهمزة على السطر..قال ليهم أمس الحاجة صحتني للسحور ..بدل ما أشرب لي موية أو آكل لي حاجة ..ضربت لي تلفون ورجعت نمت تاني.

عشان كدا اليوم كلو كنت عايش بي إحساس (لقد نفد رصيدك الرجاء تغذية البطاقة).

هسع أمانة فيك كدا – وينو (الاحتمال)؟.

تغذية البطاقة ولّا تغذية نفسك.

 

شيّالة حلاوة

زول عندو نفسيات – ودوه المصحة ..الدكتور قال ليه مالك (شاعر) بي شنو؟.

قال ليه يا دكتور والله (شاعر) وبغني كمان...لكن الناس دي ما مقتنعة.

الدكتور عرف ليك حالتو صعبة شديد.

هسع الموضوع دا كلو قابلتكم فيه (شيّالة حلاوة).

بتتكلم ساي أنت.

 

صينية خبيز 

زوجتو (صعبة) – النوع العندها (قميص واحد) داك ..واليوم كلو شايلة (المقشاشة).

الزوجة قالت لي زوجها..لو ما جبت معاك (الخبيز) ما ترجع.

الزوج قال ليها خلاص ..لغاية الساعة اتنين صباحاً لو ما جيت راجع – أعرفني مشيت على ناس الحاجة.

 

اقتراح

إن شاء الله تجي (مطرة).

عشان والي الخرطوم يقول لينا ..اقرعوا الموية بالنظر.

وصرفوا الموية بالنظر.

وافتحوا الدرو بالنظر.

ولو الموية دخلت ليكم في الغرف – طلعوها بالنظر.

نحن (نظرنا) دا – يعمل شنو ولّا شنو ولّا شنو؟.

 

شوربة مسروقة

عندهم (ديك) رايح ..بعد تلاتة أيام من فقدانه ..شافوه في (صينية فطور) جارهم عباس ود الشنب.

صاحب الديك بعرف ديكو من (شوربتو) – قال لي عباس ود الشنب ..أنا (شنبك) ما عندي فيه كلام ..لكن يومك الصايمو دا إلّا تعيدو.

ناس اللجنة الشعبية ما بقبلوه ليك.

 

نظرية 

قال ليه رأيك شنو في الكلام السمعتو دا؟.

قال ليه ..أنا ما سمعت حاجة ..لكن ناس الكهرباء ديل لو كهربتهم دي قلبوها (شمع) يكون أحسن ليهم.

 

صفيحة دغالة 

واحد مشى يخطب ..وهو ما سبق ليه أنو شاف العروس.

طلعوا ليه العروس طلعت شنة مبالغ فيها.

ما بتتقابل.

أبو العروس قال ليه  نحن ما عندنا (خطوبة) – نحن بنعقد طوالي ..ما في حاجة اسمها خطوبة ..دي (سرمحة) ساكت.

العريس قال ليه ما في خيارات تانية – بعدين (سرحمة) مع منو يا حاج؟..أنت ما شايف بنتك.

أبو العروس عمل ليهم نظرية (بلال موسى) – قال ليهم : (عقد بس).

العريس قال ليه أن بقى كدا ..اكتلوني قبلي هنا – أنا ما جاهز للعرس...ولا بقيت ليه.

 

المريخاب بعد تألق الشغيل قالوا ماشين (لوزان)

ناس المريخ وقت شافوا تألق (الشغيل) – وأقوانو البيجيب فيها زي (الخميس والجمعة) قالوا ماشين (لوزان).

تمشوا (لوزان) تقولوا ليهم شنو؟.

تقولوا ليهم نحن شطبنا الشغيل بسبب (الإصابة) – وهو لا مصاب ولا حاجة.

هو ما شاء الله زي الحصان.

 

ملحوظة 

المريخاب ..الكلام دا بخصكم براكم ...السنة دي ما تتقلوا في (الخبيز) عندكم مباراة صعبة أمام وفاق سطيف.

والله أنتوا بعد هزيمتكم أمام اتحاد العاصمة الجزائري مفروض (ستائر) ما تركبوها.

ما عندكم عيد معانا.

 

كرتونة حروف نصب

في حلتنا ..في حاجات غريبة بتحصل.

حاجات ما قادرين نفهمها.

وما قادرين نعرفها – هي ذاتها بتجي من وين؟.

في حلتنا قالوا (الموز) من الفواكه.

البطيخ من الفواكه.

المنقا من الفواكه.

الجوافة من الفواكه.

الأناناس من الفواكه.

وهدف نزار حامد في سموحة – هو ذاتو من (الفواكه).

قلنا ليهم على كدا هدف شيبون في اتحاد العاصمة الجزائري من النباتات الطفيلية.

 

أرنب نط 

مريخابي حاقد شديد.

الحقد ظاهر في قميصو.

قالوا ليه ما اسم الدولة التى تعرف ببلد المليون شهيد.

المريخابي قال ليهم : (المغرب).

الحاقد عاوز يجيب لينا (الهوا) – عارف الهلال عندو مباراة مع المغرب التطواني يوم 26 يوليو.

لكن نحن بندقس.

 

الرقم مشغول 

ضفر قالوا ليه العيد في الجزائر كيف؟.

قال ليهم ما عارف ...لكن لو دا عيدهم ..نحن بناخد خمسة من وفاق سطيف.

الناس ديل عيدهم صعب شديد.

(كعك) ما عندهم.

يقولوا ليكم الكلام ألف مرة.

 

خطين تحت الجواب 

ربة منزل ..جوها ضيوف مع الفطور ..وما عندها سلطة روب ..لا عندها عجور ولا عندها زبادي.

ربة المنزل ضربت لي والدتها ..قالت ليها يا حاجة – ما ممكن أعمل سلطة الروب بي (فجلة) ما عندي (عجور).

أمها الصيام مسخن معاها – قالت ليها ممكن ، بس ما تكتري الفجل.

بعد شوية زولتكم تاني رجعت لي أمها – وقالت ليها يا حاجة لو ما عندي (زبادي) ممكن أعمل بدلو (زيت سمسم) لي سلطة الروب.

أمها – (قلت ليكم رمضان مسخن معاها) قالت ليها الكلام دا وين؟.

البنت قالت ليها – هنا يا حاجة في سلطة الروب.

الأم قالت ليها – وبعدين الحصل شنو؟.

لو قلت ليكم الحاجة فوتت ما بترضو ..بتقعدوا تتزعلوا لي.

 

تسلل

بكري المدينة في مباراة المريخ والاتحاد شغال (شليت) في الناس.

الزول دا لو كان سايق ليه قندران كان بي الروشنة بتاعتو دي طلع من الكوبري ووقع في النيل.

 

ستائر العيد 

جمال فرفور عندو أغنية (المشكلة).

الأغنية كتبها اسحاق الحلنقي ولحنها صلاح إدريس.

أغنية اسمها (المشكلة) يعني ح يلحنها منو؟.

الأغنية دي عاوزين نركبها على الوضع الحالي.

لو الكهربة قطعت ما مشكلة...

هي قاعد تجي عشان تقطع!!.

لو الموية قطعت ما مشكلة...

موية الصحة دي عاملنها ليه؟.

أنتوا ما تحمدوا الله أنو في موية صحة.

المشكلة ...بس ناس الارصاد الجوي ديل يقولوا ح تجي مطرة..وما تجي مطرة.

وروني حل للمشكلة.

لو ما خبزتوا ما مشكلة...

الخبيز الناس خلوه.

لو ما عندكم حلاوة ما مشكلة...

أحسن ترتاحوا من حركات الشفع.

لو ما ركبتوا ستائر جديدة ما مشكلة...

هي وينها الحيط البركبو ليها ستائر؟..

لو ما عندكم ملايات جديدة  ما مشكلة...

العيد دا ما عيد ملايات..

المشكلة ..بس الحكم ما يحسب قون شيبون في الاتحاد..

وروني حل للمشكلة...

لو ما صرفتوا ما مشكلة...

أحسن تلقوها بعد العيد...(بتروح منكم ساكت)

لو ما قدرتوا تسافروا ما مشكلة...

هو ذاتو السفر مع الواتسابات دي خلوه.

المشكلة ..عيد الضحية باقى ليه شهرين وعشرة يوم.

وروني حل للمشكلة.

 

شولة هندية 

فيصل أحمد سعد من كترتو في الفضائيات في شهر رمضان هذا ...خفت امشي (الترويح) القى قاعد يصلي بينا.

الحمدلله فيصل أحمد سعد ما عملها.

 

فروقات 

زول جديد – ما عندو أي مشكلة ..قالوا ليه الفرق بين البطيخة والقرعة شنو؟.

قال ليهم زي الفرق بين هدف نزار حامد في سموحة وهدف شيبون في الاتحاد الجزائري.

 

الكشافات نفر 

بله جابر ...اتقدم وكمل اللاين ..بكري المدينة في رأس 18 قعد يكورك ليه عشان يرفع ليه الكورة.

بله جابر عاين لي بكري المدينة وقال ليه انتظرها في الكشافة الجنوبية الشرقية.

 

طاقية حايمة

جمال سالم قالوا ما ح يلعب مباراة وفاق سيطف – يعني يا مريخاب لو قابلتوا وفاق سطيف بي (المعز محجوب) ...المريخ دا بتجوا راجعين لينا بيه من الجزائر (العلمة) عديل كدا.

دا لو ما نزلتوا درجة تالتة...وارتحنا من نقتكم الكتيرة دي.

 

موسم المريخ مليء بالخسائر أربع خسائر أفريقية وخسارتين محلية 

الذي ينظر إلى موسم المريخ يجد أن موسم المريخ هذا الموسم كان مليء بالخسائر رغم (الضجة) والمغالطات التى يحدثها إعلام المريخ.

المريخ لولا (التحكيم) كان يمكن أن يخرج أمام فريق عزام التنزاني – ولولاه أيضاً لما وصل المريخ لمرحلة المجموعات بعد ضربة الجزاء (الوهمية) التى منحها الحكم للمريخ أمام فريق الترجي التونسي.

التوانسة إلى الآن شايلين حالنا بسبب هذه الضربة.

مع ذلك فقد كانت خسائر المريخ لا تحصى ولا تعد في هذا الموسم – لكن مع ذلك نحن بنحسبها.

وأصلو ما بنفوت ليهم حاجات دي.

في بطولة الممتاز خسر المريخ أمام الأهلي شندي في شندي بي هدف (عماري) – رغم وجود صلاح إدريس.

وجاء المريخ وخسر على ملعبه أمام فريق مريخ الفاشر ..رغم أنهم منحوا ضربة جزاء – وطلعوا ليهم (الشرطة) من الملعب.

لكن اتهزموا.

دا غير (التعادلات).

في البطولة الأفريقية ..أي مباراة لعبها المريخ خارج ملعبها خسرها المريخ ..يعني ما تسمعوا فصاحة الجماعة ديل.

خسر المريخ ثلاث مباريات خارج ملعبهم قبل مرحلة المجموعات.

وجاء المريخ وخسر أول مبارياته خارج ملعبه في مرحلة المجموعات أمام فريق اتحاد العاصمة الجزائري.

ويبدو أن خسائر المريخ سوف تستمر خارج ملعبه ..فهو فشل حتى في أن يحقق تعادلاً خارج ملعبه.

في الوقت الذي نجد فيه أن الهلال (سيد البلد) فعلاً لم يخسر في موسمه هذا غير مرة واحدة أمام كي أم كي.

حيث كسب الهلال معظم المباريات ..ولم يخسر حتى في المباريات الودية والإعدادية التى خاضها.

من هنا يبدو أن الفرق كبير جداً بين الهلال والمريخ ..فريق البطولة ظاهر.

فريق يخسر 6 مرات ونحن في منتصف الموسم ..يشوف ليها (سيكافا) طوالي.

ناس المريخ قالوا بدأوا يجهزوا لي قفل ملف المجموعات بعد مباراة وفاق سطيف ..في الوقت الذي سوف يفتحوا فيه ملف (سيكافا).

 

شوية زعل 

عكسية كوفي ما طلعت ..والكورة جات لي (شيبون) من غير ما تخرج من الملعب – الدليل على ذلك (فيصل سيحة) قال شافها ما طلعت.

غايتو يا سيحة الحاجات العاوز تصلحها ..بتصلحها.

 

مع الاعتذار للأغنية 

مسامحك يا حبيبي ...(لكن بعد ما ترجع لي حق البارد الشربتو ليك أثناء دراستك في الجامعة).

 

قصة قصيرة جدًا 

قالت ليه طول عرفتك بي – حصل قلت ليك كلمة زعلتك.

قال ليها أبداً والله يا حياتي.

قالت ليه طيب في داعي موضوع (زواجنا) لمن يصل (لجنة الاستئنافات) ما تحسموا لينا.

 

ولاء عملتها 

احتفل آل الفحل في شندي وأبو حمد بي نجاح وتفوق ابنتهم ولاء عبدالله البشير الفحل وهي ترفل بنبوغها العلمي وتتحصل على نسبة 81.4 % في امتحانات الشهادة السودانية لتؤكد تميّز الأسرة وتسير على درب أخوانها.

التهاني لوالدها بالسكة الحديد شندي عبدالله البشير ولمولانا القاضي عبد الفتاح البشير الفحل ..وإن شاء الله تطلع (قاضية) زي عمها.

 

نفس الشبه 

زول مشى ليه لي ناس – بقوا كل يوم يجيبوا ليه في الغداء ملاح (خدرة).

الكلام دا قبل رمضان.

زولكم تعب – وفتر فتر شديد من (الخدرة) وزولكم ما قادر يقول شيء.

ياكل في (الخدرة) لمن بقى زي (عمود المستشفى).

زولكم يوم قاعد يضرب في (الخدرة)..جات تحتهم (كديسة) خضراء ..واحد من ناس البيت قال ليه بالله شوف غرابة الكديسة دي ...الكديسة دي لونها (أخضر) عديل كدا ..والله حاجة عجيبة.

الضيف قال ليه والله لا غريبة ولا حاجة ...(خدرتكم) دي لو بياكلها (حصان) يبقى (أخضر).

هي نان الكديسة بقت (خضراء) من فراغ.

 

الموسم العاشر يرمي بـ (أغاني وأغاني) إلى مثواه الأخير

من دون شك أن برنامج (أغاني وأغاني) هذا الموسم يعتبر الأضعف مقارنة مع مواسم البرنامج التسعة السابقة.

لم يعد للبرنامج أثر في الشارع السوداني كما كان في الماضي – ولم تعد الأسرة السودانية تجتمع بعد الإفطار حول برنامج واحد كان دائماً هو (أغاني وأغاني).

وكل الآثار التى خلقها البرنامج في الصحافة السودانية – كانت عبارة عن انتقادات حادة وجهت للبرنامج.

كل الأصوات التى اعتادت المشاركة في هذا البرنامج  تراجعت مشاركتها في هذا الموسم وكان البرنامج خصماً عليها.

عصام محمد نور لا ندرى ماذا حدث له ..تراجع صوته بصورة مخيفة ولم يعد عصام عصاماً ذلك الذي كان يقدر على أن يطرب الجميع.

عاصم البنا ..تغني في هذا الموسم بأغنيات لا تتناسب مع طبقة صوته فكانت مشاركته (هزلية) مثل ملافحاته في البرنامج ومحاولته أن يكون طول زمن البرنامج (متراشقاً) حتى لو كانت الحلقة حزينة تحكي رحيل محمدية.

طه سليمان – اكتفى بتسريحة جديدة ...وبناطلين غريبة – مع نفور واضح من أسرة البرنامج فقد كانت عزلة طه سليمان واضحة – هو في وادي والمجموعة في وادي.

مصطفى السني ..هو الخاسر الأكبر هذا الموسم ..قدم أغنيات بطريقة (هامسة) جدًا – لم نعرف هل هذا الأمر ناتج من علة في الصوت أم أن مصطفى السني عاوز يبتكر لينا طريقة جديدة.

حسين الصادق كان أفضل المشاركين في البرنامج وهو الحسنة الوحيدة في الوجوه القديمة في البرنامج.

فاطمة عمر ..لا ندري أن كانت مشاركة في البرنامج أو لا.

لولا (دموعها) ما في زول كان بحس بيها.

مكارم بشير ..شكلت الإضافة الوحيدة للبرنامج وكانت أكثر من جيدة في كل مشاركاتها في البرنامج ..ابتعادها في الحلقات الأخيرة أضعف البرنامج.

كذلك كانت هدى عربي جيدة.

أما المجموعة التى شاركت في الحلقات الأخيرة شريف الفحيل وأفراح عصام وريماز ميرغني وصباح عبدالله لم تخرج مشاركتهم عن برامج الدورات المدرسية.

تشعر أنك في مسابقة المدارس.

البرنامج بصورة عامة فقد الكثير ..وكان عبارة عن إعادة – ما فيه أي جديد ..كل الأغنيات سبق أن قدمت.

غير أنهم في هذه المرة قدموها بصورة أسوأ.

نسأل الله صباح ومساء – أن يتوقف البرنامج في الموسم القادم.

تاني نحن (أغاني وأغاني) في (اف ام) ما عاوزين نشوفو.

 

حوار من طرف واحد 

كان معجب بيها.

لكن ما قادر يقول ليها كدا ..عشان خايف تقوم تفتكر أنو رامي على (موبايلها).

عندها موبايل عجيب.

 

اتجاه واحد 

ناس المرور لو عندهم (أسبوع المرور العربي)..كلموهم يجيبوا (نزار حامد) ويفتحوا بي ان سبورت.

يا ريت ناس بي ان سبورت لو كان عندهم (موية)...كان لقوا لينا حل للقطوعات دي.

 

سواق قندران 

سواق قندران وهو طالع من البيت زوجتو قالت ليه جيب لينا معاك (عجور) للسلطة.

بتاع القندران عاين في زوجتو كدا وقال ليها – الكلام دا قوليه لي زول سايق (أمجاد) – كلامك دا ما بقولوه لي زول سايق (قندران).

أنتوا ما بتعرفوا قيمة القندران.

 

بدال عجلة 

الهلال أطاح بمدرب مازيمبي.

وأطاح بمدرب سموحة.

الدور على مدرب التطواني.

والله الهلال دا لو كمل جميلو ولعب لينا مع (ولاية الخرطوم)!!...بشيل (الوالي).

لا كهربة ولا موية.

 

حاجة حريصة 

حاجة حريصة قالت سحور الزمن دا البقومو  ليه بالتلفون ..إلّا يكون بي تين وزبيب..

زمان وقت كانوا بقومنا للسحور بالجركانات ويا صائم قوم اتسحر ..كان الواحد لو ما ضرب ليه عصيدة حلبة ما بنوم.

 

علي تفتيحة 

علي تفتيحة كل ما يشتري ليه لمبة ويركبها تحرق تاني يوم..

آخر حاجة فكر يشتريها (حرقانة) جاهزة – بدل اللفة الطويلة دي.

 

السنوسي عملها 

اتأخرنا بالتهاني والتبريكات على المهندس الزراعي هيثم علي السنوسي وهو يحقق بنجاح وتفوق كبير درجة (الماجستير) في تخصصه الزراعى النادر .. تأخرنا بحثاً عن التهنئة (فد مرة) بالدكتوراه التى أضحى  هيثم علي السنوسي قريباً منها.

التهاني كلها ..نرسلها في هذا العيد ..مسربلة بالفرح والنجاح والتفوق للباشمهندس ونخص بالتهاني والدته الحاجة فاطمة صاحبة الدعوات التى لا ترد  وزوجته هويدا رفيقة الدرب والنجاح وشقيقه الهلالي الكبير عصام وكل الأهل في شندي والخرطوم.

وفي انتظار الدكتوراه.

 

صينية باسطة 

يا بشاشة الصينية الفاتت ضربوها ناس بله جابر ..عشان كدا عليكم الله الصينية دي من (تلاجتها) ما تطلعوها.

اقفلوا التلاجة بالمفتاح ..ناس ضفر ديل لمن يفطروا ما بخلوا ليهم (حلة).


Share this