Test

قوون مشوار ربع قرن ..ولسه بيناتنا المسافة

1 نوفمبر 2015
متصل الآن صفحة بدل العيش واللحمة والسكر - يكتبها محمد عبدالماجد

 

الاهداء

البصل في تركيا لن يصبح (تفاح)..

لكن (التفاح) في اكاديمية كورة القدم في السودان بيصبح (بصل).

محمد

قولوا واحد

اليوم في دنقلا مباراة (الضللة) – المريخ يواجه الاهلي شندي.

المباراة دي بتذكرني ليك الزول الكاتل ضلو...

زول من ضل لي ضل.

قدر ظروفك

تسجيلات المريخ السنة دي ح تكون تسجيلات (قدر ظروفك)..يعني المدرب يقول ليهم عاوز لي (رأس حربة) يجيبوا ليه (رأس مطوة).

عليكم اللـه هسع خالد النعسان دا ...(سهرة) في التلفزيون بحضرها ليكم.

قالوا ليك خالد النعسان بنوم من (النشرة).

يعني وقت يجيبوا النشرة الجوية – النعسان بكون في سابع نومة.

 

قوون: ربع قرن من (الشفافية) والنجاح – والوعد بيناتنا انك كل يوم تكتب إلي

مثلما كانت هذه الايام من الايام الخالدة في تاريخ الهلال ...حيث ينتصر (الموقف) ويقدم على سواه ...كانت لقوون ان تحتفل بدخولها للعام الـ (26) بنجاحات مشهودة ومعلومة على امتداد ربع قرن مضى.

نحن الوحيدون ..الذي لا نطفيء شمعة ..لنوقد شمعة جديدة ...فتاريخ قوون ليس فيه شيء يمكن ان يطفأ.

نأتي للمستقبل بدافع التاريخ.

تاريخ الصحافة السودانية ليس فيه كل ذلك الصمود والاستمرارية والنجاح الدائم.

الصحافة السودانية لا تعرف الصدور على مدى (25) سنة ...لا تخللها عطلة رسمية.

حتى في الاعياد كان (عيد) قوون في صدورها ومعانقتها للقراء.

فخرون نحن بهذه التجربة – ليس لأننا من ركاب قطارها ..ولكن لأن الصحافة السودانية اعطتنا نموذجا رائعا للنجاح والتفوق.

اظن ان نجاح (قوون) يسعد كل القطاع ...نحن نحتاج الى تلك الاستمرارية ..ليس في الصحافة فقط – ولكن في كل قوالب حياتنا.

نفتقر لذلك.

(قوون) منحتنا ان المستحيل يمكن ان يكون ممكنا.

فرحانة دوبك ..بي نداوات الكلام ...

معروفة من يومك ...تخرج حروفك في سلام...

واقفة وترتب في النظام...

مازالت الاحلام فينا خضراء ..مازلنا نحلم بصحافة تستوفى حق القاريء الكريم.

القراء يستحقون اكثر من ذلك.

لذلك يبقوا دائما هم الدافع للنجاح وهم المحرض لهم.

نجاحات الصحيفة بالتأكيد ليس بالذين يعملون فيها ويكتبون...نجاح اي صحيفة بـ (القراء).

و(قوون) سرها ونجاحها في (القاريء) الكريم.

وللحفاظ على ذلك القاريء الذكي اللماح لا بد من ان يكون الحرف بقدر قامات القراء.

سوف اكتفي بتحية القراء الكرام ..فهذا عيدهم ..لولاهم ما استمرت (قوون) ..كما اني مازلت الهث وراء (قوون) لاقرأ فيها.

كلنا قراء لـ (قوون).

اما تحية (قوون) فهي نخصها للراحل داؤود مصطفى الذي شرف (قوون) في ان يكون من ضمن كتابها.

وتحية للذين غادروها وما تخلوا عنها ...وللذين يقودونها الآن وما حادوا عن الطريق.

 

خطين تحت الجواب

اسامة ونسي عندما سألوه في الشروق عن التسجيلات واموالها – قال السلطة وعدتنا خير..موعودين بالدعم.

انتوا بعد الـ (5) نقاط دي قرش مفروض ما يدوكم ليه.

(طوبة) تاني كتيرة عليكم.

السلطة تديكم كاس السودان – وكمان تسجل ليكم.

 

تحذير رسمي

حملت انباء الصحف استقالة المعدين والمنتجين ياسر عركي ومحمد عكاشة من قناة النيل الازرق.

اذا صحت الاستقالة وتخلت النيل الازرق فعلا من هذه الكوادر المشهود لها بالنبوغ التلفزيوني والتميز في الاعداد فاننا ننصح قناة النيل الازرق ان تحول تخصصها من (البث الفضائي) الى (صيد الاسماك) او (تركيب الستائر).

اعدكم عندها ان يبدع (الطاهر حسن التوم) في صيد السمك.

 

موية باردة

كل ما اتذكر ان تشكيلة الهلال في الموسم القادم سوف يكون فيها ميسي ونيمار ...اجري اجدد كرت بي ان سبورت.

ميسي ونيمار ديل طبعا ما ح تشوفوهم في قناة (النيلين).

واللـه لو لفيتوا (الطبق) دا لمن عجنتو ما بجيب ليكم اكتر من (الزهور والورد) علي جعفر والريح علي.

 

سوط واحد

يا ناس المريخ عندنا زول في الحلة قنعنا منو ...فتح ليه (بقالة) في الخرطوم ...عاوزين لينا زول يطلع لينا تقرير وفاة ليه...عشان اهلو عاوزين يتصرفوا في (الورثة).

 

حصة معلومات عامة

بكري المدينة طلع من قائمة افضل اللاعبين الافارقة.

وطلع من قائمة افضل اللاعبين العرب..

انا شايف بعد كدا لو فتحتوا ليه (جزارة) في شارع الوادي بكون احسن ليه.

لكن كلموه قولوا ليه الجزارة ما فيها (شقلبة).

 

نص كيلو سخرية

لو في عدل كاس السودان الليلة يمنحوه الجالية الحبشية في الخرطوم.

واللـه الكاس دا بقى ما فيه اي شيء (سودانية).

بعدين الجالية الحبشية تستاهل.

 

جرس الفسحة

اعملوا حسابكم ..امير كمال الليلة لو قال ليكم في دنقلا بين الشوطين ماشي اشرب موية ..ما تخلوه يمشي براهو.

يمكن لو مشي يشرب ما يرجع ليكم تاني.

كلمتكم انا – وكنت معاكم واضح وصريح.

سطر جديد

الذين لاموا الهلال على انسحابه وقالوا ان الهلال كان يفترض ان يسلك مسلك قانوني في قضيته ..نقول ليهم نحن القانون في (شعار) الهلال ما جاب لينا حاجة ...وموضوع واضح ومعروف ..(ديل غالطونا في شعارنا)..تفتكروا القانون بقدر يجيب (حق) الهلال.

 

نحن فقدنا الثقة عديل كدا.


Share this