Test

أبو جريشة حايم مع شيبوب عبر (4) مطارات عشان في النهاية ينزل في (قاردن سيتي)

22 ديسمبر 2015
مـــــــن الغلاف للغلاف- يحررها محمد عبدالماجد / عند اللزوم فقط

المريخاب شغالين بتحويل (الرصيد) والهلالاب شغالين تحويل (الملكية)

الكاردينال لو عمل ليه طابق (رابع) ..أقنعوا من عودة جمال الوالي تاني

إهداء

الأسد كان من الحيوانات (المفترسة)..

الكلام دا قبل ما يدخل (الواتس)...

وقبل ما يظهر الفيس بوك.

هسع الحنكشة البقت على (الأسد)...خلت (الأرنب) ياكل عشاهو.

المحيرني (أبو جريشة) في البرد دا متصور مع (شيبوب).

تسجيلاتكم طلعت (برد) ساكت.

محمد

يا ونسي أنسى بس

قصة (بيانات) المريخ من عملية شيبوب ون إلى عملية شيبوب تو

في عملية شيبوب ون ...جاء في صحف المريخ هذا الخبر :

(وصف المهندس أسامة ونسي رئيس نادي المريخ ما حدث في عملية انتقال شيبوب للملكية جوبا بالدعوة الصريحة لإثارة الفوضى وأضاف : ما حدث أمر غير مقبول وبمقدور المريخ أن يقوم بنفس التصرف وأن يرد الصاع صاعين ولكن هذه ليست أخلاقنا ولا شيّمنا وشدد ونسي على ضرورة عودة شيبوب للمشاركة في إعداد المريخ من ضربة البداية بعد أن تم إخطاره بذلك لأنه مازال لاعباً بالفرقة الحمراء وأفاد أنه وفي حال عدم عودة شيبوب فوقتها لكل حادث حديث, ونفى ونسي أن يكون هناك أي تفريط من مجلس إدارة نادي المريخ في نجوم الفريق الرديف، لافتاً إلى أن المجلس اجتهد كثيراً من أجل الحفاظ على المواهب التي نجح الأحمر في اكتشافها وتطويرها وخير دليل على ذلك ترفيع مازن شمس الفلاح وإبراهيم محجوب للفريق الأول، لافتاً إلى أن المجلس لم يقصّر على الإطلاق في محاولاته لترفيع شيبوب للفريق الأول لكنه اصطدم بمطالب مالية كان من الصعب الإستجابة لها، لأن تلك الخطوة كانت ستنسف تجربة الفرق السنية التي تقدم أفضل المواهب بحافز مالي في حدود المعقول).

دا كلام أسامة ونسي (رئيس لمدة 3 شهور).

كلامو كدا.

أنت يا أسامة ونسي جديدة عليك الشغلة ..الزول دا عقده معاكم يسمح ليه بالإنتقال بهذه الصورة إلى جهة خارجية والعودة (محترفاً).

بعدين إنتوا بالذات مفروض ما تكلمونا عن الطرق غير الأخلاقية التى يمكن أن ينتقل بها اللاعبون في القمة السودانية.

أسامة ونسي دا ما كلموه وقالوا ليه إن جمال الوالي سجل بكري المدينة بعد أن وقع عقداً مع الهلال واستلم 800 مليون جنيه.

الكلام دا أصلو ما مر عليه.

ولا وقع في عينه..

خلوه موضوع بكري المدينة الذي نشرت الصحف توقيعه مع الهلال بالصورة وهو يستلم الـ (800) مليون جنيه.

يا ونسي أنت (ألوك) دا إنتقل للمريخ كيف؟.

ما عاوزين نسألك من (بكري المدينة) عشان ما تقول لينا أنا ما عندي قضية بي جمال الوالي.

ألوك دا إتفق معاه الهلال ووقع معه على عقد ..وجيتو أنتوا شلتوه بي طريقة غير (أخلاقية).

هسع يا أسامة ونسى جيت تكلمنا عن إثارة الفوضى.

فوضت شنو؟.

ممكن تقول إثارة (الصدمة).

الفوضى دي خليها هسع.

بعد عملية شيبوب تو ...مجلس المريخ أصدر هذا البيان الذي إحتوى على (التناقض) كله..وقد كان البيان على النحو التالي :

(إلى جماهير المريخ الوفية داخل وخارج ربوع الوطن العزيز ، لقد تابع الجميع تفاصيل سفر لاعب المريخ شرف شيبوب إلى مدينة جوبا عاصمة دولة جنوب السودان والجهود التى بذلها مجلس إدارة نادي المريخ فى إعادة اللاعب إلى الخرطوم بعد استغاثة اللاعب وأسرته ، وحينها كان اللاعب فى وضع مذري لفقدانه لأوراقه الثبوتية، وإستشعاراً منا لمسؤوليتنا تجاه اللاعب ومن نواحي أخلاقية وإنســانية، حينها قام المجلس بمجهود كبير وقام بتكليف أحد أعضائه للذهاب وإحضار اللاعب خلال 24 ساعة، وبعد وصول اللاعب إلى الخرطوم تم الاتفاق النهائي بين رئيس النادي واللاعب صباح الأحد 20-ديسمبر – 2015 ، وقمنا بعدها بتسليم اللاعب إلى أسرته التى شكرت المجلس على المجهود فى إعادة إبنها سالماً إليها .جماهيرنا الوفية علمنا بجلوس اللاعب مع رئيس نادي الهلال مساء نفس اليوم الذى جلس فيه صباحاً مع رئيس نادي المريخ ، وأن أخلاق وموروثات وقيم النادي ترفض مثل هذا السلوك المشين والتصرفات الصبيانية من الطرفين ، واستشعاراً منا بمسؤوليتنا تجاه الكيان ونزولاً لرغبة جماهير المريخ التى احتشدت بأعداد كبيرة بدار النادي رافضة كل المزايدات التى قام بها اللاعب تجاه النادي .عليه فإن مجلس إدارة نادي المريخ قرر صرف النظر نهائياً عن اللاعب مع الاحتفاظ بكافة الحقوق الأدبية والقانونية للنادي ).

هذا بيان مجلس المريخ ..تعالوا شوف التعليق.

مجلس قال إنهم وجدوا اللاعب فى وضع مذري لفقدانه لأوراقه الثبوتية في جوبا عاصمة جنوب السودان.

اللاعب لو كان في وضع مذري ما كان تاني مشى للكاردينال.

الوضع المذري هو ذلك الوضع الموجود فيه مجلس المريخ الآن.

مجلس المريخ قال أيضاً في بيانه : (بعد وصول اللاعب إلى الخرطوم تم الاتفاق النهائي بين رئيس النادي واللاعب صباح الأحد 20-ديسمبر – 2015 ، وقمنا بعدها بتسليم اللاعب إلى أسرته التى شكرت المجلس على المجهود فى إعادة ابنها سالماً إليها .جماهيرنا الوفية علمنا بجلوس اللاعب مع رئيس نادي الهلال مساء نفس اليوم الذى جلس فيه صباحاً مع رئيس نادي المريخ).

العملية دي عملها جمال الوالي مع بكري المدينة ..اللاعب اتفق مع رئيس الهلال ووقع عقده واستلم مقدم عقده الصباح ...والمساء مشى قعد مع جمال الوالي ..بقت ليكم حارة ليه الآن.

بل إن إتفاق مجلس المريخ مع شيبوب كان إتفاق شفهي ..وليس اتفاق مكتوب كما كان إتفاق رئيس الهلال مع بكري المدينة.

خلاص عاوزين تكلمونا عن الأخلاق والمثل والقيم الآن.

الشيء المضحك أن مجلس المريخ عاوز (يدقس) مجلس الهلال ..قاموا قلدوا طريقة الكاردينال عندما أعلن أنه صرف النظر عن اللاعب.

مجلس المريخ في بيانه جاء (عليه فإن مجلس إدارة نادي المريخ قرر صرف النظر نهائياً عن اللاعب مع الاحتفاظ بكافة الحقوق الأدبية والقانونية للنادي).

عشان بندقس ليكم.

قال مجلس المريخ قرر صرف النظر نهائياً عن اللاعب.

باللـه.

حتى في (الحيل والطرق الذكية) بتقلدوا في ناس الهلال.

ما عندكم أي ابتكار.

الهلال عمل لشيبوب تحويل (الملكية) مـــن (هــــــــــاوي) إلى (محــــــــــــــترف)

حكمة اللـه (نحن أي حاجة عندنا بي نظام).

أصلو ما عندنا حاجة ساكت.

ولا عندنا حاجة بنخليها للصدفة.

أو الزمن.

أو الظروف.

الظروف ما مضمونة.

كلام زي دا ..إلّا تلقوه عند ناس (لجنة التسيير).

مجالس منتخبة وجابتها إرادة الشعب وصناديق الاقتراع ما عندها كلام زي دا.

عشان كدا ..قررنا نحول (شيبوب) من زول (هاوي) ساكت إلى زول (محترف) عديل كدا.

في نفس الوقت عاوزين نعمل ليه تحويل (الملكية) من المريخ الذي كان يلعب فيه في (الرديف) ..قررنا نجيبوا الهلال بي عقد رسمي.

شهادة بحث رسمية.

تحويل (الملكية) عديل كدا.

أنتوا الكلام دا في (العربيات) ما قاعد يقابلكم.

في (ركشة) ساكت ما صادفكم.

(عجلة)...بس.

عارف (الركشة) مع لجنة تسييركم دي كتيرة عليكم.

العربية تلقوها وين؟.

قعدنا في الواطة ..وشربنا ليك القهوة ..والكاردينال براهو كدا من عندو - (مخمخ) ليك الحكاية.

عاوز يرتبها ليك.

عاوز يجيبها ليك زي ما بقول الكتاب.

نظام شنو؟.

نظام أي حاجة عندنا بي نظام.

فكرنا في الموضوع.

بحثنا ليك في القضية.

لقينا ليك (الملكية) دي ما بتتحول إلّا في (جوبا).

المراكز هنا كلها ما عندها الحق دا.

ولا عندها قدرة للكلام دا.

فتشنا ليك (الملكية).

لقينا ليك (الملكية) في جوبا.

علاقتنا مع (الملكية) زي الجنوب ما اتفصل.

علاقة عسل عديل كدا.

نحن وناس (الملكية) ما اتفصلنا.

حالتنا واحدة.

رئيس الملكية قال ما عندكم أي مشكلة.

ما عندكم قضية.

شلنا ورقنا ولاعبنا ومشينا ليك (جوبا).

في جوبا عملنا شنو؟.

في جوبا حولنا (الملكية).

شيبوب من (هاوي) بقى (محترف).

من (المريخ) إلى (الهلال).

شفتوا الشغل كيف؟.

أي حاجة عندنا بي نظام.

الحاجة المحيرة المريخاب – وما قادرة تقع لي محمد سيد أحمد إلى الآن، أن (السيستم قفل).

حلاوتها ذاتها في دي...في (قفلة السيستم).

الموضوع ما وقع ليهم.

ما عاوزين يستوعبوه لينا.

قدر ما شرحنا ليهم.

وقلنا ليهم جيبوا ليكم ورقة وقلم ما وقع.

قلنا ليهم الموضوع دا زي موضوع (ألوك).

بس الفرق الوحيد بين شيبوب وألوك ..ألوك ورقو مزوَّر.

وما معروف الحاصل عليه شنو؟.

لكن ورق شيبوب ..كلو تمام – ما فيه أي مشكلة.

الموضوع وقت بقى ليهم رهاب – رهاب ..جماعتكم دوروا ليك في (الجرسة).

جرسة شديدة ...(جوبا مالك علي أنا ..جوبا شلت عينيا).

واللـه جوبا شالت عيون المريخ عديل كدا.

في ناس موضوع (شيبوب) دا بقى ليهم أسخن من موضوع (الإنفصال).

في الوقت نفسو الهلالاب دوروا ليك مع النور الجيلاني ...(يا مسافر جوبا).

حاجة ما تخلص.

أنتوا يا فالحين.

يا مساكين.

يا الما عندكم موضوع.

شغالين مع لجنة التسيير دي تحويل (الرصيد) – والكاردينال بي غادي شغال تحويل (الملكية).

أقول ليكم شيء...

جمال الوالي مسكم ماسورة إسمها (تحويل الرصيد).

تحويل الرصيد عاوز يفتح ليه نادي.

قوموا يلا شوفوا شغلتكم وين؟.

العجيبة بعد (الفيلم) دا كلو ..قالوا (الملكية) في جوبا ما ممكنة.

شوفوا ليكم طريقة تانية.

موضوع جوبا دا غيروه.

إتكشف.

الكاردينال لبس (الكسكتة) وقعد يمخمخ ليك في الحكاية.

عاوز يشوف ليه (حل) تاني.

عاوز يحول (الملكية) بعيد عن جوبا.

بعيد عن (ملكية) الجنوب.

عشان كدا إترقبوا الجرايد بس.

الكاردينال ممكن يطلع ليكم بي (فكرة) جديدة.

بس أصبروا.

عليكم اللـه الكلام دا ما تطلعوه في (الجرايد).

إنتوا يا ناس الجرايد ...لسانكم خفيف...ما بتمسكوا الموضوع.

رأس السنة

في ناس رأس السنة عندهم بـ (محمد الأمين).

وفي ناس رأس السنة عندهم بـ (محمد النصري).

وفي ناس رأس السنة عندهم بـ (صلاح بن البادية وإنصاف مدني).

وفي ناس رأس السنة عندهم بـ (عقد الجلاد).

وفي ناس كمان رأس السنة عندهم بـ (شيبوب).

احتمال

في زول متفائل شديد – قال احتمال (البرد) دا يجيب ليه (سيوترات).

زي الزول البكون بيحلم مع (المطرة) تجيب ليها (سمك).

هسع دا احتمال.

اقتراح

مفروض الهلال كيتا على المريخاب ديل لمن يسجلوا (شيبوب) ..يلعبوه (باك)..

عشان نوريهم الفرق بين الهلال والمريخ.

هسع دا اقتراح دا.

رأيكم شنو مع البرد دا في كسرة بي قرع ساخن كدا.

يا زول (قرع) شنو مع (شيبوب) دا.

حكاية

في الأخبار :

إنطلق العمل في إزالة أبراج الهلال القديمة تمهيداً لتركيب الإضاءة الجديدة التي تم إستجلابها لتوافق مواصفات (الفيفا) التي حددت مقاسات خاصة وطول المسافة عن الملعب .. وسيتم التركيب فوراً قبل بدء الموسم الجديد .. حيث انخرطت الشركة المنفذة في الإزالة فعلياً.

الكاردينال دا كلموه.

نحن بعد (شيبوب) ما عاوزين لينا (أبراج).

شيبوب براهو بنور لينا.

كلام في السر

مع تقلبات الأوضاع دي ...شيبوب في الهلال ..شيبوب في المريخ ..شيبوب رجع تاني الهلال بقينا نكتب العمود في اليوم أربع مرات في (البرد) دا.

فترنا عديل كدا.

عليك اللـه يا شيبوب أركز لينا في حتة واحدة.

ما تبقى لينا زي مروحة التربيزة.

ملحوظة

حكاية أبو جريشة مع عودة شيبوب وإرجاعه من جنوب السودان ليعود تاني للهلال زي حكاية الزول البمشي الدهب ..يلقى ليه كيلو دهب يرجع بيه ..يقوموا يغشوه ويشيلوه منو.

دا مهرجان أم مأتم

ظروف تسليم الصفحات من بدري لم يمكني من متابعة (مهرجان) المريخ أمس ..لكن ح أشوف ليكم التفاصيل في العمود (وان طال السفر) بره.

لكن الشيء العاوز (أقولو) ليكم مهرجان المريخ بقى زي العريس العندو (حبوبته) أتوفت في يوم حنتو.

لا دلوكة ولا ضريرة.

مهرجان بدون (شيبوب) تعملوا بيه شنو؟.

أمير كمال قعد (يجقلب)

قالوا ليك أمير كمال وقت شاف (العز) العائش فيه (شيبوب) وكسكتة الكاردينال والقروش البدفع فيها الكاردينال (كاش)...ندم في عمرو وسف التراب.

أمير كمال قال أنا لو عارف (الجهجهة) دي كنت سافرت (جوبا).

واحد واحد

لو عارفين (شيبوب) بعمل كدا كان شاركنا بيه في (ذا فويس)..ما كان مشينا بيه (جوبا).

هسع دا وقت يسافروا فيه (جوبا).

نسفروا جوبا يرجعوه.

يرجعوه ..نشيلو منهم.

أقلب الصفحة

أنت يا أبو جريشة في (البرد) دا حايم مع (شيبوب) في (4) مطارات ..عشان في النهاية تنزلوه في (قاردن سيتي).

تعب مطارات ساكت.

وخسارة طيران.

وقت ما عندكم قروش (اللفلفة) الجوية دي لزومها شنو؟.

قال شنو قال شيبوب يعود (جوياً).

صينية باسطة

الهلال بقى تخصص في المريخ خطف (إرتكازات).

ما خلينا ليهم (إرتكاز) حايم.

فريقهم بقى زي (البيت) الما فيه (باب) مركب.

هسع وينها (صينية الباسطة) في كلامك دا؟.

بتغشوا في الناس ساكت.

أشرف الكاردينال رئيس نادي الهلال أثبت بالورقة والقلم وشيبوب ..أن الخيل الحرة بتجي بعد (السيستم) ما يقفل.

الخيل الحرة بتجي بعد (السيستم) ما يقفل

المشكلة وين

مدرب المريخ المنتظر البلجيكي لوك اخيراً وصل الخرطوم بعد تلتلة لإكمال إتفاقه النهائي مع المريخ للإشراف على فريق الكرة والإنخراط فوراً في الإعداد للموسم الجديد بعد أن كان مقرراً له المغادرة إلى بلجيكا نسبة لخضوع إبنته لعملية جراحية «شوفتو الوهمة دي كيف » وبعد ده مامضمون يتعاقد مع المريخ لحالة «الشيرنق » التي تعيشها لجنة التسيير

غايتو ناس (لجنة التسيير)...الرزق البقع ليهم من السما..بطير منهم.

عدم القروش ..بعمل حاجات زي دي.

مع تقرحات في المعدة.

يا ناس المريخ بي لجنة تسييركم دي ..ما عندكم خيار غير صلاح مشكلة ...أنتوا (فاروق جبرة) طار منكم.

فكرة مختلفة .. فكرة مختلفة .. فكرة مختلفة ..

مريخابي وقعت فيه (صاقعة) ...كسرت ليه (11) سن و (35) ضلعة ..وشالت ليه (إضنينو) الإتنين وكراع وإيد والطوحال والمرارة والكلي الجوز..

ولحست ليه مخو بالكامل..

الجماعة قالوا ليه معقولة (صاقعة) تعمل فيك كدا.

المريخابي قال ليهم العملها فينا انتقال (شيبوب) للهلال الصاقعة ما عملتها فيني ...وناس مزمل أبو القاسم بيغشغشوا فينا ساكت.

أنا (الصاقعة) يا ريتها لو كتلتني.

يا ريت لو انتهت مني ..قبل ما أشوف (شيبوب) بشعار الهلال.

المشكلة ناس الهلال خطفوه مننا تاني.

هسع الدفع قروش التذاكر بتاعة الرجعة منو؟.

أوعكم يكون جمال الوالي.

أول شارع

المريخاب ديل وقت ما عندهم قروش ...وقت عاوزننا نصدق أن لجنة التسيير ما عندها قرش ..(ألوك) دا سجلوه بـ (3) مليار من وين؟.

هسع الـ (3) مليار دي ما كان سجلت ليكم الباشا وشيبوب.

عاوزين ولد الناس يقعد ليكم (هاوي) ساكت.

إنتوا يا ناس سوداكال وقت ما عندكم حاجة..بتخطفوا الولد من جوبا مالكم.

حايمين بيه في المطارات دي كلها ..وما عندكم ليه قروش.

أديتوه (البرد) ساكت.

فالحين واللـه.

هسع (الفلاحة) هنا وينها؟.

الحب أصبح بدون مستندات وأوراق ثبوتية

-أكثر ما أوهن (الحب) في هذه الأيام أنه أضحى حب من غير مستندات وأوراق ثبوتية.

-أصبح الحب كأنه مجهول الأبوين – أو مجهول الهوية طالما كان من غير مستند.

-غابت بين المحبين في السنوات الأخيرة – الخطابات ، والجوابات التى كانت تتبادل بين العشاق في الماضي – فتدعم الحب، وتقويّه، وتبقى حافظة له من عوامل الغدر، والنسيان، والتنكر، والخيانة.

-كان العشاق يوثقون لحبهم بكتابة الخطابات – وكان للخطابات ذلك الأثر الكبير – وفيه كان من الحنين، والحياة ما يجعل الحب باقياً، وصامداً أبد الدهر.

-الأغنية السودانية احتفت بذلك (التخليد) للحب فكانت (حبيبي أكتب لي وأنا بكتب ليك) و (كتبت ليك لا بيني بينك ريدة لا قصة غرام) – و (ما في حتى رسالة واحدة بيها اتصبر شوية) – و (من طرف الحبيب جات أغرب رسائل) – و (البريدو مالو اتأخر بريدو) – و (رسلت ليك أجمل خطاب لليلة ردك ما وصل).

-كل هذه الأغنيات هي (شهادة) إثبات للحب – عندما كان للحروف (نبض) وكان لخط اليد ذلك (الحس) الذي ينقل حنين صاحبه بالتفاصيل الدقيقة.

-الآن انتهت الخطابات وكتابة اليد – وغاب (تعطير) الرسائل، ورشها بموية الورد، ورسم قلب واختراقه بسهم جارح.

-كان عندما يكون عند المحبين تلك (المستندات) يصعب التنكر بين المحبين ، وتستحيل الخيانة.

-وأن كان ذلك لا يعني أن الحب يبقى غير قابل وقتها للانتهاء – فقد غنى عبد العظيم حركة (الرسائل العندي شيلها وكل ذكرة ريد جميلة) – وهذا يعني أنه في حالة الخلاف في الحب فإن إرجاع الرسائل أمر لا بد منه حيث يتم الاستلام والتسلم لكي لا تكون هناك دليل إدانة للمحب.

-طبعاً أخو البنت إذا قبض عندها (جواب) من ود الجيران ممكن يقدد لأخته وود الجيران عيونهم.

-لذلك كانت (الجوابات) بين العشاق تعامل معاملة (الممنوعات).

-أما الأخطر من ذلك فهي (الصورة).

-كان للصورة تلك المكانة العزيزة – وكان لا يتم تبادل (الصور) بين العشاق إلا إذا وصل الحب لمرحلة خطيرة ، وأضحى لا سبيل من الإعلان عنه.

-والأغنية السودانية احتفت كثيراً بالصورة (توعدني وتبخل بالصورة) – و (وصورتك الخايف عليها) – و (الصور العندي شيلها).

-الجوابات والصور كانت تمنح الحب حصانة من (الفشل) – وكان في الصورة والجواب (وقاية) من الغدر ، والخيانة ، والنسيان.

-الآن دخلنا لعصر رسائل (SMS)- وأصبح الواتس آب ناقل جيد للشمارات والرسائل والصور.

-ينتهي الحب بـ (تدليت) الرسائل ، ولا أثر للحب ، لا عطر ، ولا حرف ولا حتى (سهم) صغير يقسم القلب على إتنين.

سين وجيم

إنتوا جمال الوالي قال جيبوا لي (شيبوب) في البيت ليه؟...وليه ناس مزمل أبو القاسم ومعاوية الجاك زعلانين كدا من أسامة ونسي وسوداكال.

خلى بالكم جمال الوالي كان عاوز يتصور مع (شيبوب).

جمال الوالي عجبتو فكرة الكاردينال ...قال أحسن يقلدها.

غايتو لو جمال الوالي جاكم في فبراير القادم لابس ليه (كسكتة) ما تستغربوا.

الزول دا القعدة – سخنت معاه.

عاوز الرجعة.

قرار تاريخي

بعد مقال بابكر سلك (العرجا لمراحها)..وعودة (شيبوب) للهلال بعد صور أبو جريشة ..قرر أخونا (سلك) الإنسلاخ رسمياً من المريخ والإنضمام للنسور.

سلك قال في (النسور) على الأقل ...ما في ناس (الرشيد علي عمر) عشان ينقاروه كدا.

يا سلك – واللـه في (النسور) ترتاح جنس راحة.

النسور لا فيها الرشيد علي عمر ولا خالد عز الدين ولا يس علي يس ولا (الكسكتة).

زول بيسألك مافي.

 


Share this