Test

إختر عنوانا مناسبا لهذا العمود !!

23 مايو 2016

بالعربي الكسيح-محمد الطيب الأمين

  • معظم الذين يقولون : (حالة أخير منها العرس) ، هم في حقيقة الأمر غير متزوجين ..

  • ما متزوجين ومع ذلك يقول ليك : (حالة أخير منها العرس) ..

  • العرس في نظر الكثيرين هو (أدنى حد من العذاب) ، عشان كده الواحد لما يقنع بيقول : (أخير منها العرس) ..

  • وطبعا ده كلام ما صاح لان الزواج هو إكمال لنصف الدين وفيه كثير من الرحمة والمودة والسعادة والإستقرار ..

  • ولكن ..

  • أظن وليس كل الظن إثم ان المشجع المريخي الذي أكمل زفافه أمس بدولة المغرب عقب طيران المريخ قد طبق هذه المقولة ..

  • مشجع المريخ (نيكسون) الذي ذهب إلى المغرب لمؤازرة المريخ أمام الكوكب أكمل أمس مراسم زفافه على فتاة مغربية بمدينة (فاس) ..

  • ولعله قد طبق مقولة : (حالة أخير منها العرس) ..

  • قنع من خيرا في المريخ فأتم نصف دينه ..

  • ولو سار جمهور المريخ على درب هذا الشاب فان كل نساء الوطن العربي والأفريقي موعودات بالزواج خلال السنوات القادمة ..

  • تاني البنات في الدول العربية ح ينتظروا المريخ بفارق الصبر ..

  • واللـه صحي ..

  • المريخ يطير بهنا يقوموا المشجعين يتزوجوا بهناك ..

  • عشان كده أنا بتوقع إنو البنات في الدول العربية ح يتابعن (القرعة الأفريقية) سنويا حتى يعرفن (جدول مباريات المريخ) ..

  • لو كل ما يطير المريخ الجمهور بيتزوج يبقي نقول : (وداعا للبورة في الوطن العربي) ..

  • بس يا حبذا لو المريخ بيطير من أم درمان عشان الزواج يكون من نصيب (بنات بلدنا) بدلا من أن يكون من نصيب الأجنبيات ..

  • أخير ليكم العرس ..

  • لو باريتو ناس مصعب عمر ديل على بالنعمة لا بتلمو في عرس ولا في بطولة ..

  • وبما إنو الشاب ده تزوج بعد فشل المريخ يبقى حقو تدرسوا خيار تحويل المريخ ليصبح منظمة خيرية تساعد الشباب على الزواج بدلا من (لعب الكرة التى تحولت إلى مصارعة) ..

  • كنتوا بتلعبوا كورة وفجأة بقت مصارعة وما معروف بكرة تبقى شنو ..

  • غايتو جنس غايتو ..

  • مبدئيا ثبت أن بيلاتشي يتمتع بشخصية (طبق الأصل) من شخصية كافالي ..

  • طبعا مع إختلاف (الأكياس) ..

  • والخوف كل الخوف أن تكون شخصية بيلاتشي سببا في رحيله مثلما كانت سببا في رحيل كافالي ..

  • ظاهريا هم بيقولوا سبب رحيل كافالي (الكيس) ولكن باطنيا سبب الرحيل هو (الشخصية) ..

  • أول خطوات نجاح بيلاتشي هي الصبر عليه ..

  • في محاولة لتبرير الفضيحة قالوا ان لاعبي المريخ تعرضوا لاساءات عنصرية بالمغرب ..

  • وده حنك ساكت ..

  • اساءات شنو الإتعرضتوا ليها ؟؟

  • كلامكم ده تقولوا لزول ما عندو (خالو) في الدار البيضاء ..

  • شوفوا ليكم زول قبل كده ما أكل (محشي) وقولوا ليهو الكلام ده ..

  • لكن ما تقولوا لينا إحنا ..

  • إحنا اولاد تسعة ودافننو سوا ..

  • كده خليكم من الضرب وشغل المصارعة ده ..

  • هل الطيران والهدفين وبونية الحكم برضو عندها علاقة بالاساءات ؟؟

  • ما مشكلة كده نقول إنو فعلا المصور إتلفظ بالفاظ عنصرية ..

  • طيب ..

  • الحكم ده لا من المغرب ولا من مصر ولا من تونس ..

  • الحكم لونو زي لونا وشكلو زي شكلنا .. معقولة يكون برضو الحكم وجه لكم إساءات عنصرية ؟؟

  • ما ممكن طبعا ..

  • يبقي سؤالنا : (البونية في شنو ولشنو) ؟؟؟

  • لو أي فريق بتغلب وبيطير والخصم بيدق الحكم واللـه العظيم ما في حكم بيطلع سليم من أم درمان ..

  • أى خصم واجه المريخ بأمدرمان كان ممكن أفراد بعثته يضربون الحكام ..

  • القصة ما قصة عنصرية ..

  • القصة قصة فريق منهار ومتوسط أعمار لاعبيه (30) سنة ..

  • أها كويس في المغرب عنصرية .. طيب في الأردن لما إتغلبتوا (7) برضو كان عنصرية ؟؟

  • في الأردن عنصرية ولا برد ؟؟

  • برد بـ(الفاء) ؟؟

  • الزنقة التى يمر بها قادة الاتحاد العام هذه الأيام تشبه زنقة القذافي أو قل تشبه زنقة حسني مبارك ..

  • وياريت واللـه مصير قادة الاتحاد العام يكون نفس مصير حسني مبارك ..

  • الشال بلاتر من الكرسي قادر ان يشيل (بلاتراتنا) من نفس الكرسي يا معتصم ..

  • اللـه في ..

  • سيكون (الأعمى شايل المكسر) الخميس القادم عندما يواجه الهلال سانت جورج الأثيوبي ..

  • جمهور الهلال في شوق كبير وشديد للهلال ..

  • نشتاق للهلال (المعافى) ..

  • هلال من غير (عله) ..

  • هلال يسعدنا ويعوضنا الأيام الخوالي ..

  • الهلال الذي يلعب كرة قدم فيها (شكل ولون ومذاق وريحة) ..

  • بمناسبة الريحة ..

  • كمية (الآبري) الذي يمر هذه الأيام بمطار الخرطوم تفوق كمية (الآبري) الذي يمر عبر (الميناء البري) ..

  • آبري يحيرك ذاتو ..

  • تمشي المطار تشم الريحة تحلف تقول السودان ده كلو صايم رمضان بره السودان ..

  • من خلال الريحة في المطار عرفنا إنو البلد دي ما فضل فيها زول ..

  • والغريبة ريحة الآبري في المطار تزامنت مع ريحة (طيران المريخ) ..

  • ناس المريخ كانوا منتظرين (ريحة بعرفوها براهم) وظهرت ليهم ريحة تانية ..

  • المهم ..

  • أنا عايزك تعرف إنو المطار بقى عندو كم ريحة ..

  • بعد فضيحة المغرب دي ناس المريخ تاني إلا يشمو ريحة (الموقف الشعبي) و(الميناء البري) ..

  • بعد البلطجة العملتوها دي ما في ليكم سفر قريب ..

  • المطار ده إلا تمشوا تتصوروا معاهو (سليفي) وترجعوا ..

  • (الكاف) ما بيرحمكم ..

  • وبالمناسبة ..

  • ودي بشرى لكل أندية الممتاز ..

  • المريخ سيدخل الدورة الثانية بنفس شكله الذي لعب به الدورة الأولى ..

  • ما في ولا لاعب من السجلوهم ديل بيدخل التشكيلة ..

  • ودي فرصة كبيرة لكل الفرق إنها تحصل النقاط من (الإصيفر) ..

  • طبعا كنا منتظرين مباراة القمة عشان نشوف موكورو وهو بيعانق شباك المريخ ..

  • ولكن إرادة اللـه وزعل الكاردينال عجل برحيل موكورو قبل القمة ..

  • ولكن ما راح شي .. موكورو عندو قون في المريخ بشعار هلال الأبيض ..

  • وكلو في النهاية هلال ..

  • قلتوا لي عنصرية ؟؟

  • يعني تانى كل ما المريخ يطير إحنا نعرف سبب الطيران (عنصري) ..

  • سمعنا بـ(الطيران المغربي) لكن (طيران عنصري) دي أول مرة نسمع بيها ..

  • غايتو جنس غايتو !!

  • ونركب صافنات ونجيبة (حسانية) وأصلو الزول بيموت والذكرى تفضل حية ..

  • و..و..

  • وبخاف اسأل عليك الناس و...(ويقول أنا عنصري كمان) !!

 

Share this