السبت 1 أكتوبر 2016
Test
تمديد فترة المراهقة !!
30 مايو 2016
بالعربي الكسيح - محمد الطيب الأمين
-
حتى وقت قريب كانت (المراهقة) تبدأ من سن (16) سنة وتنتهي عند مشارف العشرين ..
-
ده طبعا زمن الدنيا كانت بخيرها ..
-
الآن ونظرا للظروف الإقتصادية وتكاليف الزواج الباهظة أصبحت سن المراهقة تبدأ من سن (16) سنة وتستمر حتى (35) سنة ..
-
تلقى الواحد عمره (34) سنة ولسه مراهق ..
-
بقينا الزمن البنقضيهو في المراهقة أطول من الزمن البنقضيهو ما في المراهقة ..
-
والـله صحي ..
-
بعيدا عن هذه المراهقة المتعارف عليها نقول : في أى مجال هنالك مراهقة ..
-
خاصة في مجال الإدارة الرياضية ..
-
نقول الإدارة الرياضية لان معظم الإداريين الذين دخلوا هذا الوسط كان هدفهم الشهرة والسلطة ..
-
وهؤلاء الإداريين (فعلوا ما فعلوا) قبل أن يقوم لهم (ضرس العقل الإداري) ..
-
ولقد أثبت (علم الإجتماع) أن (المراهق ميسور الحال) يحتاج لضبط ومراقبة أعلى وأكثر من (المراهق الفقير) ..
-
لان المال في كثير من الأحيان يقترب منه الشيطان ، ثم أن المال يوهمك بأنك (قادر على كل شئ) ..
-
المهم ..
-
المراهقة في مجال الإدارة يدفع ثمنها غالبا (فريق الكرة) ..
-
ولعل هذا الشعب يذكر جيدا كيف أن فريق المريخ قد دفع ثمن المراهقة الإدارية باهظا ..
-
لم تمر على المريخ فترة اسوأ من فترة جمال الوالى الأولى ..
-
أكثر من ثماني سنوات والمريخ يخرج من تخبط ويدخل في تخبط حتى أشفق عليه الخصوم قبل الأحباب ..
-
ومن الأشياء التى لم يحمدها إعلام المريخ للمهندس أسامة ونسي هى أن الرجل دخل المريخ (بضرس العقل) ولم يراهق إداريا داخل أسوار النادي ..
-
ونجح ونسي في أداء مهمته على الوجه الأكمل وفق ما توفر له من مال ..
-
الحاجة الوحيدة الممكن تكون خصما على ونسي هي (شرف شيبوب) ..
-
كونو شرف شيبوب يطلع من أم درمان ويوقع للملكية جوبا ويطير ليلعب في تونس ثم يستقر في الهلال فهذا ضعف إداري باين ..
-
ولكن لما تجي تقارن (حادثة شيبوب) التي حدثت في عهد أسامة ونسي ستجدها أخف قدرا من (حادثة فييرا) التى حدثت في عهد جمال الوالى ..
-
أهل المريخ الآن يختصرون (المريخ في جمال الوالى) ..
-
كل ما يفعله أهل المريخ الآن يؤكد ان المريخ بدون جمال الوالى (صفر على الشمال) ، وهذه كارثة كبيرة وعقدة سيدفع ثمنها (الإصيفر) مستقبلا ..
-
المريخ في الحقيقة يعيش معاناة كبيرة بسبب شح واضح في القيادات ..
-
المريخ بلا قيادات ..
-
وحتى القيادات الموجودة فهي (فقيرة) لا تقوى على الصرف ولذلك فضلت تقديم (الوالى رئيس طوالي) ..
-
وأكثر ما يدهش أن مجتمع المريخ يتمسك بالوالى الذي هو بلا إنجازات ..
-
هذا أمر غريب بالفعل ..
-
جمال الوالى ورغم ما يملك من أموال إلا أنه لم يشكل اي إضافة تذكر بالنسبة للمريخ كـ(فريق كرة) ..
-
وهذا يكشف حجم طموحات أهل المريخ التى تقاصرت فأصبح كل همهم أن يسجل لهم جمال الوالي مشاطيب الهلال ..
-
كل أهل المريخ كانوا (يحدرون لأسامة ونسى في الضلمة) لمصلحة جمال الوالى ..
-
ولما تجي تشوف تاريخ الوالى بالمريخ تجده أكثر من عادي ..
-
في عهد الوالى حقق الهلال أعظم وأرفع إنجازاته المحلية وذلك بتحقيق الدوري بفارق (18) نقطة في سابقة لا مثيل لها محليا ..
-
وكذلك حقق الهلال الدوري بفارق سبع نقاط هذا بخلاف المتواليات ..
-
فشل جمال الوالى فشلا ذريعا في مجال الكرة وتجرع في عهده الفريق الهزائم الثقيلة والخفيفة لدرجة جعلت ملعبه الذي شيدته الحكومة مصدر تفاؤل بالنسبة للخصوم ..
-
جمال الوالى الذي يعتبر هو أكثر رئيس نادي في العالم يتقدم باستقالته وأكثر رئيس نادي يسحب استقالته لم يحقق للمريخ شيئا يذكر بخلاف (دورة سيكافا) غير المحترف بها ..
-
فاز بها المريخ وأعتقد أن لاسامة عطا المنان نصيب في ذلك الكاس ..
-
ومن الأقوال المأثورة قول عصام الحضري : (أنا كنت قايل سيكافا دي فريق في أفريقيا) ..
-
وبعيدا عن هذا يبقى الفرق كبير وشاسع بين الهلال والمريخ ..
-
إحنا في الهلال لما صلاح أدريس هرب في نفس اليوم الذي هرب فيه إستطاع الهلال ان يفوز بالخمسة على فريق كابس يونايتد ..
-
صلاح هرب بالصباح والهلال فاز بالخمسة ليلا ..
-
ومنذ ذلك اليوم صلاح أدريس فشل في العودة رغم الجهود الكبيرة التى بذلها من أجل العودة ..
-
صلاح قام من (كرسي) الهلال عشان (يبشر) جا لقى غيرو قعد وفتش للرجعة فكانت مستحيلة حتى عبر صناديق الإنتخابات وليس التعيين ..
-
وما حصل شفنا لينا مشجع هلالي عمل مسيرة ..
-
الحاجات دي مستحيل تحصل في الهلال ..
-
حكاية المسيرة والتحانيس دي ما بتحصل في الهلال ..
-
لانو الهلال نادي عندو شخصية ..
-
الهلال بيصنع القيادات وليس العكس ..
-
يمشي الحكيم يجي الأرباب ، يمشي الأرباب يجي الفريق المدهش ، يمشي الفريق المدهش يجي شيخ العرب ، يمشي شيخ العرب يجي البرير يمشي البرير يجي الكاردينال ..
-
هكذا هو الهلال ..
-
في المريخ يمشي جمال الوالى ويجي جمال الوالى ..
-
يمشي (العارف) ويجي (عزو) ..
-
والغريبة (عزو) بيمشي وبيجي بالتعيين ..
-
الناس دي بتحب التعيين حب عجيب ..
-
ناس المريخ مفتكرين التعيين حاجة كويسة ..
-
والـله صحي ..
-
فاكرنها حاجة مميزة عشان كده لما يقول ليهم الوزير إجتمع باللجنة بيفرحوا ..
-
غايتو إحنا في الهلال من أنصار عودة الوالى ..
-
والسبب إنو المريخ في عهد جمال عادة (حيلو بيكون ميت) ..
-
بتحس بيهو (ممحوق كده) ..
-
ويكفي أننا في عهد جمال حققنا أرقام قياسية ..
-
جمال الوالى غير (طابق شاخور ده) ما عمل حاجة للمريخ ..
-
ولا ح يعمل ..
-
عشان كده حبابو ألف ..
-
مرحب بيك في دارك ..
-
وعودة جمال أكبر المستفيدين منها هم خليفة والطاهر حماد وكرنقو وبقية مشاطيب الهلال ..
-
بس أنا زعلان لأسامة ونسي ..
-
ما بيستاهل هذا التنكر وهذه البلاغات ..
-
وأنا والـله لو كنت في محل أسامة ونسي على بالقسم أبيع أثاثات النادي والبص والمراوح والمكيفات عشان أسدد الديون ..
-
لكن أسامة ونسي مسكين ..
-
حتى النجيلة دي لو بتجيب حاجة ببيعها عشان أسدد ديون أصلا هو ما عندو فيها ذنب ..
-
لكن أسامة ونسي طلع هلالابي مسكين ساكت ..
-
عموما .. المريخ هو جمال الوالى ..
-
ونركب صافنات ونجيبه (شكرية) وأصلو الزول بيموت والذكرى تفضل حية ..
-
و..و..
-
وإنتظرتو لما ما جا ...(عملنا ليهو مسيرة) ..