Test

التاريخ يعيد نفسه هروب زيكو 1996م يُعاد 2016م

31 يوليو 2016
انتوا كدا اقدروا اول حاجة لبكري المدينة ..قبل ما تتطلعوا ليكم (بيان) تساندوا فيه (هروب) الاهلي مدني
رئيس نادي الاهلي مدني المحامي بدرالدين عوض اللـه عمل فيها (زين العابدين بن علي) طبق نفس النظرية
عندما قام ابوبكر عامر بهذه العملية وهرب من الملعب افتكرت ان قناة النيلين قامت باعادة لقطة هروب منتصر زيكو
بدرالدين عوض اللـه طلع ما عندو اي كلمة ..شهر شابكنا ليك المباراة لن تنقل تلفزيونيا
 
 
    مباراة الهلال امس امام الاهلي مدني اعادت للمريخاب ذكريات مؤلمة جدا (يا اخوانا البنات الجري دا ما حقي) – لذلك نقول ان الهلال بحجر واحد صاد ليه (120) عصفور.
    في 28 عصفور ظهروا على حقيقتهم.
    مجلس المريخ ابو (28) عضو – المجلس الذي يضيع حقوق ناديه اخرج (بيان) بيدافع فيه عن الاهلي مدني.
    قبل ما تساندوهم بـ (بيان) يا ريت تلتزموا ليهم بالوعد الذي قطعه معهم جمال الوالي بدعمهم (ماليا).
    عليكم اللـه نادي منافس…هل يجوز دعمه من نادي يلعب معه في نفس الدرجة؟.
    رئيس نادي الاهلي مدني من غير خجل قال امس في صحيفة قوون (فريقنا يعاني ..طلبنا من جمال الوالي الدعم).
    وبتكلموا بعد دا كلو عن (عدالة المنافسة).
    مجلس فيه (28) عضو ..بيشيد بسوء السلوك وبيعزز وبيساند (الهروب).
    ما غريبة عليهم.
    سبق ليهم (الهروب).
    مجربين الموضوع دا.
    الدم بيحن.
    والعرق دساس.
    مجلس المريخ وقت ما قدر يعمل حاجة في المول والنادي الاسري والفندق ..قال احسن يطلع ليه (بيان) يساند فيه الاهلي مدني.
    انتوا كدا اقدروا اول حاجة لبكري المدينة ..قبل ما تطلعوا ليكم بيان تساندوا فيه (هروب) الاهلي مدني.
    طلعوا ليهم بيان بيساندوا فيه (الشلاليت).
    والخبط.
    والجري.
    بتكلموا عن التحكيم وصلاح نمر في اي مباراة يلعبها مفروض يطردوه (7) مرات.
    اي مباراة بعمل فيها صلاح نمر ضربة جزاء والحكم ما بحسبها.
    والاخوة بيحدثونا عن (التحكيم).
    الاخ (اعدادية) برضو.
    واللـه كبرتوا وبقى عندكم صوت.
    مجلس ملقط ساكت ..ومعين بقرار وزاري – اتت به السلطة بتحدث عن الهلال نادي الوطنية والخريجين.
    انتوا فاكرنو (سيخ).
    قايلنو (طوب احمر).
    اكبروا شوية.
    لكن نحن مقدرين هذه الحالة.
    المباراة اعادت للمريخ ذكرى الخسارة امام هلال بورتسودان الذي كان يلعب امامهم بتسعة لاعبين مع ذلك فاز عليهم.
    شفتوا الفرق.
    المريخ خسر امام هلال بوتسودان وهو يلعب بـ (9).
    ونحن انتهت مباراتنا امام الاهلي مدني بي (هروب) الاهلي مدني.
    هروب بمباركة الرئيس.
    اتاريه رئيس نادي الاهلي مدني كان رافض التلفزة عشان (الهروب) دا.
    رئيس نادي الاهلي مدني المحامي بدرالدين عوض اللـه عمل فيها (زين العابدين بن علي) طبق نفس النظرية.
    الذكري الثانية والمؤلمة جدا للمريخاب ان هروب الاهلي مدني برئيسه ..اعاد ذكري هروب منتصر زيكو عام 1996.
    عرفتوا البيان طلع ليه؟.
    عشان هروب الاهلي اعاد ذكري هروب المريخ.
    هروب 1996 اتكرر سنة 2016م.
    بعد (26) سنة الهروب بيتكرر تاني.
    نفس الشيء.
    والتفاصيل.
    ضربة جزاء.
    يرفضوا تنفيذها.
    يشيلوا الكورة ويطلعوا من الملعب.
    نفس الملامح والشبه…والوقفة ذاتها وجريتها.
    الغريبة هروب منتصر زيكو مجلس المريخ ما طلع فيه (بيان).
    هروب ابوبكر عامر طلع فيه مجلس المريخ (بيان).
    كدي شوفوا (هروبكم) اول.
    عندما قام ابوبكر عامر بهذه العملية وهرب من الملعب افتكرت ان قناة النيلين قامت باعادة لقطة هروب منتصر زيكو.
    لولا انني شاهدت رئيس نادي الاهلي مدني في المجموعة (الهاربة) كنت افتكرت اللقطة معيودة.
    هروب زيكو للامانة ما كان فيه (رئيس).
    رئيس شغال بماكينة (حارس مرمي).
    لا بد ان (الوجعة) في المريخاب الآن اكبر من الوجعة عند (الاهلي مدني) الذي يقوده رئيسا (مشجعا للمريخ).
    وقد اعلن رئيس نادي الاهلي مدني (مريخيته) اكثر من اعلانه عن انتمائه للاهلي مدني الذي يقوده رئيسا.
    شفتوا ليكم (رئيس) بيقوده (حارس مرمي).
    رئيس كلمته عند (حارس المرمي).
    فاضل بس يلبس ليه (جونتيات).
    ولا عجب في ذلك – فقد كان رئيس نادي الاهلي مدني قبل اكثر من اسبوع يجري في الحوارات ويخرج في التصريحات بحثا عن الاضواء والضجة وانتشار صوره في الجرايد.
    الزول دا بتاع صور واضواء وتصريحات.
    تخيلوا هذا – رئيس نادي عندما وجد ان حارس مرماه يسرق منه الاضواء بهروبه وخروجه من الملعب (زي زيكو) قرر ان يكون له نصيب من هذه الاضواء.
    قام هو ذاتو قال ليهم اطلعوا.
    امرهم بالهروب ..عشان يطلع ليه بي حاجة من الاضواء والصور.
    وقت رئيس النادي بيعمل كدا – الغرابة تبقى شنو في (جريّة) حارس المرمي وهروبه؟.
    رئيس نادي الاهلي مدني (الهروب) ما غريب عليه.
    بدرالدين عوض اللـه طلع ما عندو اي كلمة ..شهر شابكنا ليك المباراة لن تنقل تلفزيونيا.
    بدرالدين عوض اللـه يوم المباراة كان عنده حوار في صحيفة قوون قال فيه : (لن نسمح بتلفزة مباراتنا امام الهلال اليوم).
    باللـه.
    وقال : (على طاقم التلفزيون الاستمتاع بالاجواء الخريفية في الخرطوم بدلا من الحضور لمدني).
    يا راجل.
    المباراة تلفزت.
    ونقلت للمشاهدين على قناة النيلين على الهواء مباشرة.
    وزولكم ما خلى ليه موقع او جريدة ما اكد فيها عدم تلفزة المباراة.
    هذا الامر يثبت ان رئيس النادي يبحث عن (الاضواء).
    عاوز صوره تنزل في الجرايد.
    الليلة اكيد صاحبكم مصرح في كل صحف المريخ.
    وصوره نازلة اكتر من صور جمال الوالي.
    وهروبه منقول على الهواء مباشرة.
    اقول ليكم – فعلا المباراة ما اتنقلت على التلفزيون ..فما كنا نشاهده من ضرب وخبط لا علاقة له بكورة القدم.
    تلفزوا لينا (الهروب).
    يبقى هذا الانتصار وهذه النقاط التى حققها الهلال في مدني ..نقاط غالية علينا جدا.
    نقاط كشفت لينا الجماعة.
    ورتنا المحرش.
    التركي والمتورك ظهروا لينا في (عصرية) واحدة.
    اتخيلوا الاهلي مدني صاحب (الهروب) ما طلع (بيان) مجلس المريخ ابو (28) عضو طلع ليه (بيان).
    الوصيف في شنو؟.
    مجلس المريخ شال عمود مزمل ابوالقاسم وطلعو (بيان).
    زيتنا في (بيانا).
    تعالوا شوفوا (المسخرة) في بيان (بص الوالي).
    اول حاجة قالوا (مطالبة الاتحاد باتخاذ إجراءات عاجلة تستهدف إصلاح حال المنافسة الرئيسية، ووقف الممارسات التي أفرغت الرياضة من معناها التنافسي الشريف).
    رجعوا ليهم لجنة الاستئنافات.
    رجعوا ليهم سمير فضل تاني.
    واسامة عطا المنان.
    ناس المريخ بتكلموا عن (التنافس الشريف)!!.
    عجائب!!.
    الناس ديل جنوا.
    ما يقوموا يصدقوا كمان.
    في النقطة التانية قالوا في البيان : (حل لجنة التحكيم المركزية بعد أن ثبت فشلها وتأكد عجزها وصارت تشكل خطراً داهماً على النشاط الكروي في السودان).
    رأيكم شنو لجنة التحكيم يمسكها مامون ابوشيبة؟.
    في النقطة الثالثة في البيان المساند للهروب قالوا : (توفير العدالة للنادي الأهلي مدني وإنصافه من الظلم الفادح الذي تعرض له أمام الهلال).
    الموسم الماضي وقت الهلال ساند الامل ووقف معه لماذا احتج المريخاب؟.
    ولماذا قالوا انتوا مالكم ومال الامل.
    الاهلي مدني انكشف.
    طلع (رديف) المريخ.
    النقطة التى نتفق فيها مع بيان المريخ هي النقطة الاخيرة والتى جاء فيها : (تعيين حكام أجانب لبقية مباريات طرفي القمة في الدوري الممتاز).
    هذا طلب مجلس الهلال منذ مباراة القمة الاخيرة.
    نحن في الموضوع دا بتلقونا قدامكم.
    اما الامر المضحك والذي يثبت ان المريخ (ضل) الهلال وانه بقلد في الهلال حتى في انسحاباته فهو ما ختم بيه بيان (الهروب)…حيث جاء في البيان (الفضيحة) : (بالعدم سيعيد نادي المريخ النظر في أمر مشاركة فريقه في مسابقة الدوري الممتاز إلى حين توفر العدالة فيها).
    يلا انسحبوا ..عشان الموسم القادم مشاركات خارجية ما تحلموا بيها.
    لا الابطال ولا الكونفدرالية.
    الهلال في الموسم الماضي انسحب من اخر المباريات ..ونقاطه اهلته للمشاركة في البطولة الافريقية.
    انتوا انسحبوا من الآن – عشان تنزلوا التانية.
    انحسبوا عليكم اللـه.
    يبقى لا استاد.
    ولا فندق.
    ولا مول.
    ولا نادي اسري.
    ولا كورة.
    الهروب جاري في دمكم.
    لو شافوه في مدني يساندوه ..ويقيفوا معاه.
    غريب واللـه.
    الفريق الذي يفوز بقرارات (مكتبية)..بتكلم عن فريق بفوز رغم الخبط والضرب في الملعب.
    نحن الاندية بتهرب امامنا …بجروا من (الميدان).
    ما بنكوس لينا انتصار في (مكتب).
    وكمان بتحدثوا عن عدالة المنافسة.
    طلعوا بيعرفوا (العدالة).
    ………..
    ملحوظة : ناس بتجري سنين طويلة ..وناس بدون ما (تجري) توصل!!.
 
هوامش
 
    الاهلي مدني افسد المباراة بالضرب وايقاف المباريات …لذلك لا نستطيع ان نلوم لاعبي الهلال على الاداء.
    الهلال لم يكن مقنعا في المباراة.
    لكن لا بد ان نقول ان لاعبي الهلال نجحوا في اخراج لاعبي الاهلي من اجواء المباراة.
    ما اكتفوا بحالة طرد واحدة…طردوا اتنين.
    وهجوم الهلال اجبر دفاع الاهلي في ارتكاب ضربة جزاء في الزمن البدل الضائع.
    هذا شيء يحسب للهلال.
    تعاملوا بخبرة وذكاء كبير مع المباراة.
    هذه الاحداث يجب ان لا ينشغل بها الهلال.
    لا المجلس ولا الجهاز الفني..ولا حتى اعلام الهلال.
    ركزوا في مباراة شندي.
    الهلال عنده مباراة يوم الثلاثاء القادم امام الاهلي شندي.
    المباراة مباراة البطولة ان شاءاللـه.
    ركزوا في هذه المباراة ما تهتموا لصغائر الامور.
    الحاجات دي ما تشتغلوا بيها.
    عندنا الاهم.
    الجوهرة.
    والقناة.
    والاذاعة.
    وبطولة الممتاز.
    وبطولة كاس السودان.
    قالوا للحرامي احلف ..قال جيبوا لي المصحف.
    نقاط مدني تبقى الاجمل.
    والاغلي.
    لأنها تحققت بعد (الهروب).
    ولأنها رفعت ضغط الجماعة وطلعتهم برة شعورهم.
    الانتصار في شندي هو الاهم.
    ناس المريخ قنعوا من الممتاز بقوا يفكروا في لجنة الاستئنافات.
    اكبروا شوية.
    دا ما (بيان) عاوز ليه (28) عضو.
    ……..
    عاجل : بكري المدينة ما خاطي عليكم!!.
 

Share this