Test

الشركة الصينية دي بعد كدا بتنضم ليكم (عربي) عديل!!

29 أغسطس 2016

(أشرف) براهو عمل (3) طوابق.. مجلس (الشرف) حيطة في النادي ما بعملها ليكم

سمعتوا الكاردينال بالغلط قالوا اجتمع بالشركة الصينية قبل (الجوهرة الزرقاء).. مجلس المريخ عملها كلها اجتماعات مع الشركة الصينية

طيب وقت أي عضو في مجلس الشرف يدفع (20) مليون جنيه ..انتوا جايبنكم لي شنو يا عصام الحاج ويا مزمل..؟

موضوع (الاجتماعات) دا مجلس أسامة ونسي كان قادر عليه.. الموضوع دا ما عاوز ليه (28) عضو في المجلس و(40) عضو في مجلس الشرف

في 9 سبتمبر القادم سوف تكمل لجنة تسيير المريخ (3) أشهر منذ توليها الاشراف إدارياً على المريخ.

  • أي أن لجنة تسيير المريخ سوف تكمل بعد أسبوعين نصف المدة من الفترة التي كلفت بها لقيادة المريخ.
  • مضى نصف الزمن.
  • تاني.
  • مضى نصف الزمن.
  • 6 أشهر هي الفترة المحددة للجنة تسيير المريخ مضى منها قرابة الـ (3) اشهر وتبقى مثلها ولم نر لمجلس المريخ المعين شيئاً من الوعود أو (جركانات العسل) التي وعد بها المجلس قبل التعيين.
  • عملوها لينا كلها اجتماعات مع الشركة الصينية.
  • وترشيد في الصرف.
  • وقفل للبلف.
  • عبدالصمد محمد عثمان غير يقفل ليكم (البلف) ما بعمل ليكم حاجة يا ناس المريخ.
  • الزول دا شغال قفال.
  • نذكركم أن مجلس المريخ المعين – مكون من (28) عضو (بص الوالي).
  • أو شهر فبراير.
  • ونذكركم – أن المجلس هذا عندما جاء بقرار وزاري ..وعد بانشاء فندق خمس نجوم في نادي المريخ.
  • شوفوا (الكضب).
  • ووعدوا أن يحولوا نادي المريخ إلى فندق.
  • نادي المريخ هذا سقط من سقفه المستعار بسبب الاهمال لاعب شباب المريخ محمد آدم – له الرحمة والمغفرة.
  • هذا الموقع ذو السقف المستعار كان مجلس المريخ أبو (28) عضو قد وعد بتحويله إلى فندق.
  • وفندق خمس نجوم كمان.
  • كان تصلحوا (السقف) ساكت كدا.
  • الفندق خلوه.
  • لغاية الآن (نجمة) ساكت ما شفناها في الفندق الموعود.
  • مجلس المريخ (بص الوالي) أبو (28) عضو وعد بنادي أسري (فخم) في منطقة الحتانة.
  • مجلس المريخ (شهر فبراير)…كان قد وعد بمول تجاري ضخم ، ضمن الخطة الاستثمارية التي وضعها المجلس.
  • عليكم أمان الله (طبلية) ما شفناها ليهم.
  • كانوا كل ما يتعصروا في حتة ..يقولوا ليك مجلس المريخ اجتمع بالشركة الصينية.
  • أمانة فيكم قبل (الجوهرة الزرقاء) سمعتوا مرة بالغلط ..أشرف الكاردينال دا قالوا اجتمع بالشركة الصينية..؟.
  • ناس المريخ عملوها لينا كلها (اجتماعات) مع الشركة الصينية.
  • كبري المك نمر ما استهلك كل هذه (الاجتماعات).
  • انتوا قاعدين لمتين؟.
  • خففوا ايديكم شوية.
  • باقي ليكم (3) اشهر.
  • انتو يا ناس المريخ لو عاوزين تعملوا ليكم (حزب سياسي)…الموضوع ما بحتاج للاجتماعات الكتيرة دي.
  • عندكم شنو؟.
  • صعبتوا الحكاية اكتر من كبري الدباسين.
  • (الصينيين) ديل ناس شغل ..ما ناس اجتماعات.
  • كمان عاوزين تخربوا لينا (الصينيين).
  • الشركة الصينية الشغالة في الجوهرة الزرقاء …لو شافت اجتماعاتكم دي (غرفة) ما بتعملها في استاد الهلال.
  • مجلس المريخ ذهب أبعد من ذلك في الفشل ..ففشل في حل مشكلة (تراوري) لأنها مشكلة (مادية).
  • وفشل المجلس في حل مشكلة (سالمون) – عشان ما عندهم قروش.
  • طيب من الأول بتتفاصحوا مالكم؟.
  • كان تخلوا أسامة ونسي.
  • تفتكروا نحن ناقصين وجع رأس.
  • فرقكم شنو من مجلس أسامة ونسي؟.
  • بل ان مجلس المريخ زاد الأمور تعقيداً.. ولم يحسن التعامل مع مشكلة بكري المدينة وعلاء الدين يوسف.
  • الموضوع دا ما عاوز ليه قروش.
  • المضحك ..جماعتكم وقت اتعصروا قالوا عاوزين يعملوا ليهم مجلس شرف اربعيني.
  • 28 عضو ..ما عاوزين يدفعوا.
  • عاوزين يعملوها (اجتماعات) مع الشركة الصينية.
  • والله خايف من اجتماعاتكم الكتيرة مع الشركة الصينية يا ناس المريخ ..الشركة دي تقوم تنضم ليكم (عربي).
  • الناس ديل كترت عليهم النضمي.
  • بعد كدا (الصينيين) ديل بنضموا ليكم (عربي).
  • جماعتكم الموضوع غلبهم ..قبلوا ليكم على مجلس الشرف المريخي.
  • قالوا عاوزين ليهم 40 عضو في مجلس الشرف.
  • واي عضو في المجلس يدفع (20) مليون.
  • والله فالحين.
  • دا استثماركم.
  • طيب وقت أي عضو في مجلس الشرف يدفع (20) مليون جنيه ..انتو جايبنكم لي شنو يا عصام الحاج ويا مزمل؟.
  • تفتكروا مجلس الشرف دا ناقص ليه زول ينظر ليه؟.
  • ناقصين هم بتاعين جبايات.
  • انتو عاوزين تعملوا شنو يا جمال الوالي؟.
  • قاعدين ليه؟.
  • عاوزين تتحولوا في آخر عمركم لبتاعين (جبايات).
  • ما في مجلس شرف بدفع ليكم القروش دي.. وانتوا تقعدوا تجتمعوا مع (الشركة الصينية).
  • موضوع (الاجتماعات) دا مجلس اسامة ونسي كان قادر عليه.. الموضوع دا ما عاوز ليه (28) عضو في المجلس و(40) عضو في مجلس الشرف.
  • ما تقعدوا تقطعوا لينا حاجات ساكت من رأسكم.
  • كمان عاوزين في اخر عمرنا ..تخربوا لينا الصينيين.
  • عاوزين تخلوا لينا الصينيين ديل ناس (نضم) ساكت.
  • أوعكم.
  • نحن الحاجات دي ما بنسمح بيها.
  • باقى ليكم (3) شهور …كملوها من سكات.
  • مجلس المريخ (28) عضو.
  • ومجلس الشرف (40) عضو.
  • وحيطة ما قادرين يعملوها في نادي المريخ.
  • فضيحة السواد.
  • أشرف الكاردينال براهو شغال.
  • بعمل في الجوهرة الزرقاء.
  • بسم الله ما شاءالله عليها.. (الجوهرة) بقت تضحك براها من غير سبب.
  • نجيلتها فيها (27) لون.
  • والطابق بفتح ويقفل براهو.
  • تلاتة طوابق ..طابق ينطح طابق.
  • الموضوع دا شغال فيه (الكاردينال) براهو.
  • الحكومة (طوبة) ما جابتها ليهو.
  • لا مجلس من 28 عضو.
  • ولا مجلس شرف.
  • أشرف براهو.
  • والشيء العجيب ..الجوهرة ما قفلوها.
  • نلعب فيها ..والشركة الصينية شغالة في شغلها.
  • مجلس المريخ ابو (28) عضو (بص الوالي) غلبو انو يكون ند لاشرف الكاردينال ..قاموا عملوا ليهم مجلس الشرف.
  • واشرف براهو.
  • بعمل في الجوهرة الزرقاء من تلاتة طوابق.
  • وبدفع الرواتب ..والحوافز.
  • ما عندنا أي محترف عامل مشكلة.
  • مكسيم.
  • وسادومبا.
  • وشيبولا.
  • ما شاءالله عليهم.
  • وجهاز فني بقيادة الروماني الخطير (بلاتشي).
  • صائد البطولات.
  • انتوا يا ناس مجلس الشرف ..محسن سيد يقطع رأسكم؟.
  • طيب لو عندكم مدرب روماني كان عملتوا شنو؟.
  • برهان يعمل فيكم كدا.
  • هسع أمانة فيكم ..(برهان) دا – عاوز ليه مجلس شرف.
  • مجلس شرف علي شنو؟.
  • والفرق (6) نقاط.
  • اللهم احفظها نعمة من الزوال.
  • معقولة بس اشرف الكاردينال براهو يعمل فيكم كدا.
  • يمشي عطبرة يتبرع.
  • يمشي بورتسودان ..يتبرع.
  • يمشي نيالا يتبرع.
  • وانتو سالمون ما قادرين تحلوا مشكلتو.
  • الكاردينال عمل الجوهرة.
  • الكاردينال جاب شيبوب.
  • شيبوب دا عشرة مجالس شرف ما بتقدر عليه.
  • ورديف.
  • وشباب.
  • وصدارة.
  • وبلاتشي.
  • وجوهرة زرقاء من ثلاثة طوابق.
  • والله بالجد – احمدوا الله ساكت.
  • وارموا قدام.
  • ……….
  • ملحوظة : يا عصام الحاج لو دا شغلك.. كان أحسن ليك تكون قاعد في معارضتك.

هوامش

  • صلاح نمر ..وبكري حماد ..ومحمد الرشيد …نجوم الصف الأول في المريخ.
  • بكري المدينة لو عاوز يرجع بعد كدا ..إلّا يرجع مساعد مدرب.
  • لكن ما عندو مشكلة.
  • ناس الأهلي شندي بفتشوا ليهم في مهاجم وطني.
  • كليتشي بحقق في ارقام عجيبة.
  • وعجوبيتها انها لا مع الهلال ولا مع المريخ.
  • عجوبيتها انها مع الأهلي شندي.
  • المريخ سوف يواجه الخرطوم الوطني.
  • وسوف يواجه هلال الأبيض.
  • وسوف يواجه هلال كادقلي.
  • وسوف يواجه مريخ نيالا.
  • وسوف يواجه الأهلي شندي.
  • وكل هذه الأندية تتصارع من أجل بطاقة تمثيل السودان افريقياً.
  • بلاتشي ..مدرب شغال صاح.
  • بي اخلاص.
  • ومن غير كلام كتير.
  • وجرايد.
  • وجوطة.
  • بلاتشي ..بس في شغلو.
  • مباراة الهلال والأهلي الخرطوم ..يا ريت ناس قناة النيلين من بدري يعلنوا انها غير متلفزة.
  • عشان يكون عندهم كلمة على الأقل.
  • كل مرة بقولوا ليك مباراة الهلال متلفزة ..وما بقدروا على الكلام دا.
  • احسن تكونوا واضحين من البداية.
  • الخرطوم الوطني في الفترة الاخيرة مستواه تراجع كثيراً.
  • ولو استمر الخرطوم الوطني بهذا التراجع ..ممكن يفقد فرصته في تمثيل السودان في البطولة الكونفيدرالية.
  • مريخ الفاشر …اتخذ قراراً شجاعاً وهو يوقف كابتنه.
  • هذا القرار أثبت أن مجلس إدارة مريخ الفاشر ..مجلس واعي.
  • ايقاف عماد عبدالله كان بسبب الاعتداء على إبراهومة مدرب هلال الأبيض.
  • حدث ذلك رقم القيمة الفنية الكبيرة التي يمثلها عماد عبدالله.
  • العقوبات التي اصدرها الاتحاد على بعض لاعبي هلال كادقلي كانت عقوبات قاسية …لكن الخروج عن السلوك القويم ..يستحق مثل هذه العقوبات.
  • لماذا لم يعاقب الاتحاد العام بكري المدينة بهذه العقوبات وهو يعتدي على الحكم جسدياً ولفظياً.
  • مفروض الحاجات دي ما يكون فيها خيار وفقوس.
  • حسام البدري عاد للأهلي من جديد بعد استقالة مارتن يول.
  • حسام البدري مغضوب عليه من بعض جماهير الأهلي بسبب هروبه السابق من الأهلي.
  • نجاح البدري مع الأهلي سوف يكون مستحيلاً.
  • مرة أخرى نؤكد أن عبدالرحمن درمة يقدم تحليلاً جيداً للحكام في قناة النيلين.
  • يحفظ لدرمة ان تحليله يأتي عقب المباراة مباشرة.
  • مع ذلك هو يغطي كل الحالات.
  • …………
  • عاجل : الزول من يعمل ليه مجلس شرف ..بكون عاوز يقعد كتير.

Share this