Test

(17) طريقة لكي يفوز المريخ ببطولة الممتاز بعد أن أصبح الفارق (9) نقاط

29 أغسطس 2016

والله لو جينا للحق ..انتوا بدل ما كان ترجعوا بكري المدينة ..كان ترجعوا لجنة الاستئنافات بي سمير فضل رئيسها

السنة دي الاتحاد العام إلّا يغير اللوائح والنظم ويطلع قانون جديد يقول فيه (وصيف) المنافسة هو (بطلها) ، وهو صاحب اللقب

لو عاوزين تلحقوا الهلال بعد الفارق دا ، إلّا تعملوا ليكم (دورة ثالثة) للدوري الممتاز

بعد أن أصبح الفرق بين الهلال والوصيف (فلكياً) تسع نقاط ، بعد خسارة المريخ أمس أمام الخرطوم الوطني اعتقد أن المريخ لكي يفوز ببطولة الدوري الممتاز هذا العام لابد له من استعمال (الخطة ب).

  • جيبوا ليكم خروف.
  • ما تضبحوه.
  • اتصوروا معاهو (سيلفي).
  • دي الطريقة الأولى.
  • بي صراحة انتو عاوزين ليكم شغل تقيل لكي تفوزوا ببطولة الدوري الممتاز.
  • قبل كدا كلمتكم في الحتة دي.
  • عاوزين ليكم (71) حاوي.
  • عاوزين تفوزوا ببطولة الممتاز بي ناس صلاح نمر ..وخالد النعسان؟.
  • بتبالغوا معانا.
  • موضوع الكورة دا أحسن انسوه ..وشوفوا ليكم طرق تانية للفوز ببطولة الدوري الممتاز.
  • اتصرفوا!!.
  • اعملوا ليكم طابق تاني في استاد المريخ!!.
  • الكورة انسوها.
  • اصلكم (الميدان) انتو ما من ناسو.
  • اشتغلوا الشغل التاني.
  • شغل المكاتب ..والمكيفات الباردة…والمراوح الشغالة.
  • انتو ح تستغربوا وتقولوا لي الدوري باقي ليه سبعة أسابيع ..كيف للمريخ أن يفوز بطولة الدوري الممتاز بعد هذا الفارق الكبير؟.
  • إنت بتتكلم ساي.
  • وكلامك دا ما فيه أي منطق.
  • لا منطق ولا كمونية.
  • المريخ دا عاوز ليه (منطق).
  • اتحادنا العام دا شغال بدون منطق.
  • ما عارف (الكمونية) الدخلها في الحتة دي شنو؟.
  • الواحد بقى يهلوس بـ (الخروف).
  • هسع ح تعيدوا كيف مع فارق الـ (9) نقاط دي؟.
  • السنة دي ما عندكم عيد.
  • ما أظن السنة دي في زول بيسافر يعيد في البلد.
  • كلهم ح يقولوا عندنا شغل.
  • بقى عليكم (خروف).
  • و (9) نقاط.
  • مرارة الخروف مع فارق الـ (9) نقاط ما بتتاكل.
  • لكن ما عندكم مشكلة ..بشوف ليكم طريقة للفوز بالدوري الممتاز بعد الحالة دي.
  • بحلها ليكم.
  • عندي ليكم (17) طريقة لكي تفوزوا بطولة الممتاز.
  • الطريقة الأولى قلتها ليكم في بداية العمود.
  • طريقة سيلفي الخروف.
  • ما تشوفو الموضوع دا بعيد.
  • ومستحيل.
  • وما ممكن يتحقق.
  • ح اقولكم ما تستغربوا – الموسم الماضي ..الفرق برضو كان (9) نقاط ..تدخل أسامة عطا المنان واستعان بلجنة الاستئنافات ..التي حولت بطولة كاملة للمريخ ليفوز بها وهو الوصيف.
  • البطولة فاز بيها (الوصيف).
  • دي سمعتوا بيها قبل كدا.
  • غايتو السنة دي الاتحاد العام إلّا يغير اللوائح والنظم ويطلع قانون جديد يقول فيه (وصيف) المنافسة هو (بطلها) ، وهو صاحب اللقب.
  • ناس أسامة عطا المنان ممكن يعملوها.
  • يعني الأندية تبقى بتتنافس على المركز الثاني – بتتنافس على (الوصافة).
  • نرجع ونقدم ليكم الكيفية التي يمكن أن يفوز بها المريخ بالبطولة بعد الحالة دي.
  • بعد أن اصبح الفارق (فلكياً) تسع نقاط.
  • لو عاوزين تلحقوا الهلال بعد الفارق دا ، إلّا تعملوا ليكم (دورة ثالثة) للدوري الممتاز.
  • بدل دورتين ..دوري من (3) دورات.
  • ودي الطريقة التانية من الـ (17) طريقة.
  • تضيفوا (17) مباراة تاني للدوري الممتاز.
  • والله لو جينا للحق ..انتو بدل ما كان ترجّعوا بكري المدينة ..كان ترجّعوا لجنة الاستئنافات بي سمير فضل رئيسها.
  • ما عندكم رأس.
  • بكري المدينة بعمل ليكم شنو؟.
  • بكري المدينة من رجعوه ..الهزائم ظهرت تاني.
  • ورجعوا تاني يفركوا لينا في ايديهم.
  • الفرق بتاع الـ (9) دا ناس محمد الرشيد وصلاح نمر وخالد النعسان ما بقدروا عليه.
  • صلاح نمر فرق في (البطيخ) ما بجيبوا ليكم.
  • عاوزنو يجيب ليكم فرق الـ (9) نقاط.
  • انتوا بتحلموا.
  • في زول بقرأ طب ..بـ (التربية الريفية).
  • نسبتكم دي ما بتدخلكم (طب).
  • لو قعدتوا في الدوري الممتاز مع ناس صلاح نمر ديل ..ما قصرتو.
  • قلت ليكم قبل كدا .. قلت ليكم صلاح نمر بجيب خبركم.
  • شوفوا هدف صلاح الأمير أمس ..بدأ من (سرحة) صلاح نمر ..فات فيه معاذ القوز زي الما حصل حاجة.
  • مروحة شغالة غلط.
  • بدل ما تدور كدا ..بدور كدا.
  • صلاح نمر عاوز ليه (اجازة بدون مرتب) عشان يلتفت ليكم.
  • زول تقيل.
  • اللفتة عاوزة ليها اجازة.
  • لو اتقدم …..عشان يرجع عاوز ليه (6) شهور.
  • لمن ينط فوق ..عشان ينزل في الواطة ..عاوز ليه خميس وجمعة.
  • انتو بتتكلموا كيف؟.
  • زول الكورة ظاهر ..ما عاوز ليه واسطة.
  • ولا كلام جرايد.
  • ناس صلاح نمر والنعسان وعبده جابر ..ما بقدروا على الكلام دا ..الشغل دا بي صراحة كدا عاوز ناس لجنة الاستئنافات.
  • دا شغل ليل.
  • شغل تحت التربيزة.
  • ودي الطريقة الثالثة لفوز المريخ ببطولة الدوري الممتاز بعد فارق الـ (9) نقاط.
  • ناس لجنة الاستئنافات طبعا ولا بتلفتوا.
  • ممكن أي مباراة خسرها المريخ يعيدوها ليكم.
  • او يعتبروا المريخ فايز فيها.
  • انتو فاكرين ناس لجنة الاستئنافات في حاجة قاعد تغلبهم.
  • الموسم الفات ..الدوري الممتاز كان فيه لجنة استئنافات..لو جبتوا ليها فاتورة الموية ساكت بعيدوا ليك المباراة.
  • ديل كانوا لو جبت ليهم (مروحة) بعيدوا ليك المباراة.
  • لجنة استئنافات الموسم الماضي ..لو جابوا ليها فريق النسور ..ممكن تشيلو بطولة الدوري الممتاز.
  • عادي.
  • اصلو ما عندهم قشة مرة.
  • والله يا جماعة فارق الـ (9) نقاط دا مريح بي شكل.
  • تحس بي راحتو في عضمك.
  • زي الهوا البارد.
  • ندخل على الطريقة الرابعة ..التي يمكن أن يفوز عبرها المريخ ببطولة الدوري الممتاز.
  • بعد الحالة دي.
  • جيبوا ليكم (قرد) وعلموه لغات.
  • القرد دا لو اتعلم ليكم الإنجليزية ..والفرنسية والألمانية والإسبانية والتركية في (21) يوم ..بتفوزوا بالدوري الممتاز.
  • اعصروا ليه على (الموز).
  • لو كترتوا ليه (الموز)..القرد بتعلم ليكم أي حاجة.
  • ما تقنعوا انتوا بس.
  • الطريقة الخامسة ..جيبوا ليكم (ركشة)..وشوفوا ليكم مكانيكي شاطر شديد.
  • جيبوا ليهو عدته.
  • المكانيكي دا لو في (15) يوم قلب ليكم (الركشة) دي (طيارة)..بتشيلوا الدوري.
  • انتو قايلين طياراتنا دي طيارات.
  • كلها قالوا كانت ركشات.
  • خلاص ما تزعلوا.
  • ممكن نعملها ليكم (أمجاد) بدل الركشة.
  • المكانيكي لو قلب ليكم الأمجاد (طيارة)…اصلو ما عندكم مشكلة ..بنديكم بطولة الممتاز.
  • وفارق الـ (9) نقاط ..اعتبروه ولا كان.
  • ما في زول بيسألكم.
  • الطريقة السادسة :
  • ازرعوا ليكم شجرة لالوب.
  • الشجرة دي ..لو في أسبوع ..شالت ليكم (تفاح) – اعتبروا نفسكم أبطال لهذه النسخة من الدوري الممتاز.
  • التفاح لو صعب عليكم ..بنعملوا ليكم (دوم).
  • الطريقة السابعة :
  • اعملوا ليكم شوربة عدس.
  • شوربة العدس دي ..اعصروا فيها ليمون ..لو قلبت ليكم شوربة العدس (سمك) انتو أبطال الممتاز هذا العام.
  • الطريقة الثامنة :
  • الدولار ينزل.
  • يعني بدل ما يكون الدولار بـ (16) جنيه أو (17) جنيه ..أو (20) جنيه ..يمكن الدولار وأنا بكتب في عمودي دا يرتفع.
  • المهم الدولار ينزل ويبقى بـ (4) جنيه.
  • ما عاوزين نقول ليكم تلاتة ..أو اتنين..عشان ما نطمم ليكم بطنكم.
  • أنا عارف الطريقة دي صعبة – لكن يا جماعة فارق الـ (9) نقاط ..كبير والله.
  • أعمل ليكم شنو؟.
  • خلاص ممكن نشيل الدولار دا ..ونشوف ليكم طريقة تانية.
  • لو الاسعار انخفضت.
  • الكهربة رجعت للتسعيرة القديمة.
  • والجنيه يبقى فيه (10) رغيفات ..بتشيلوا الممتاز.
  • وجوز الحمام يبقى فيه (13) فردة.
  • والخميس والجمعة يكون بيناتهم (سبت).
  • الطريقة التاسعة:
  • جيبوا ليكم (71) حاوي.
  • ومزمل أبوالقاسم وبابكر سلك..(عشان ينفخو سمح).
  • واشطبوا صلاح نمر.
  • وخالد النعسان.
  • وحماد بكري أو بكري حماد – والله العظيم ما عارف اسمو.
  • وضفر.
  • ومصعب عمر.
  • بي صراحة اشطبوا الفريق كلو.
  • وألّا أقول ليكم حاجة أسهل من حكاية الـ (71) حاوي ديل.
  • شيلوا جمال الوالي ..وخلوا صلاح نمر في حتتو دي.
  • ما بتجيكم أي عوجة.
  • باقي الطرق ..بكملها ليكم بكرة إن شاءالله ..عشان الظاهر علي سرحت.
  • ……….
  • ملحوظة : وألّا نشوف البيحصل شنو؟…خلوها على الظروف.

هوامش

  • ناس الهلال ما يكتلو فرحتنا ..الليلة لا بد من الانتصار أمام الأهلي الخرطوم.
  • الله يشيل العوارض.
  • قولوا يا رب.
  • خلونا نمشي خطوة ..خطوة.
  • ونلعب الكورة بي جدية ..ومن غير استهتار.
  • أو تهاون.
  • جمهور الهلال مطالب أن يحضر اليوم بكثافة للجوهرة.
  • عاوزين في أي مباراة نحتفل بالبطولة.
  • أي مباراة خلونا نعتبرها مباراة بطولة.
  • ما في مباراة ساهلة.
  • المريخ لسه في انتظاره هلال الأبيض ..وهلال كادقلي ..والأهلي شندي.
  • وفي انتظاره الأهلي مدني في مدني.
  • ومريخ نيالا في نيالا.
  • الخطر قدامهم.
  • يكفي أن مباراة القمة في استاد المريخ.
  • وأظن دي اكتر مباراة مضمونة للهلال.
  • المهم خلونا نحسم من بدري.
  • نركز.
  • ونلعب بي جدية ومسؤولية.
  • عشان نتفرغ لكأس السودان.
  • السنة دي الدوري والكأس.
  • دا هدفنا الأساسي.
  • وما بنتراجع عنو خطوة.
  • الأهلي الخرطوم ممكن يكون ليكم أهلي مدني تاني.
  • أو أهلي شندي.
  • أو حتى النسور.
  • عشان كدا .. احرصوا شديد.
  • وألعبوا كورتكم.
  • أهم شيء ..الجمهور يملأ الجوهرة.
  • ما تخلو ليكم حتة فاضية.
  • …………..
  • عاجل : غايتو يا صلاح نمر الخدمة التي قدمتها للخرطوم الوطني ..وقت كنت بتلعب معاهم ما قدمتها ليهم.

Share this