Test

أكرم الهادي سليم معذور.. اتلخبط في (الصلع)

29 أغسطس 2016

بيني وبينكم (صلع) الطاهر سادومبا وإدوارد سادومبا ..ما عارف الحكم بيفرزها ليكم كيف

“”””””””””””””””””

هسع بعد (الجوهرة الزرقاء) يا أكرم الهادي سليم ..نجيلة ملعب استاد الهلال قالوا طعمها بقى سكر ..سكر

“”””””””””””””””””””””””

سادومبا دا يغيب (3) سنوات ..أول ما يرجع ..أول شيء بيعمله بجيب قونو في المريخ، ثم يسأل عن أكرم الهادي

“”””””””””””””””””””””

  • إدوارد سادومبا – لو لقى أكرم الهادي سليم في (سوق ليبيا).. بيجيب قونو فيه.
  • متعودة دائماً.
  • أول ما بشوف أكرم ..بجيب قونو ..ثم يقلب الصفحة.
  • ثم يعود ويشوف الحاصل شنو؟.
  • سادومبا لو لقى أكرم الهادي سليم في قطر ..بينزلو من قطرو .. يجيب قونو ..ويمشي يشوف ليه شغلة تانية.
  • بتفرغ لصناعة اللعب بعد أن يسجل في اكرم.
  • عشان كدا أمس سادومبا – أول حاجة صرف المعلوم ..واتفرغ للحاجات التانية.
  • مرة يمرر لمدثر كاريكا ..ومرة يمرر لشيبولا.
  • بعد الحصة انتهت قبل على صناعة اللعب.
  • نظام شنو؟.
  • نظام نحن أي حاجة عندنا بي نظام.
  • بتذكروا الكلام دا.
  • سادومبا دا يغيب (3) سنوات ..أول ما يرجع ..أول شيء بيعمله بجيب قونو في المريخ.
  • بعد كدا بقبل على أكرم الهادي سليم.
  • زولي هوووي.
  • زولي الأخضر.
  • سادومبا لمن رجع سأل عن أكرم ..عاوز يشوفو وين؟.
  • عشان يجيب قونو فيه ..ولو بيلعب في الصين.
  • سادومبا ما بخلى حاجاته ..ولا بتنازل من هذه الأشياء.
  • الطريف في الأمر ان الطاهر سادومبا بعد أن شارك في آخر دقائق المباراة..كاد أن يسجل هدف من تسديدته القوية. بعد أن توغل الطاهر سادومبا وصوب في اتجاه المرمى.
  • من شابه سادومبا ما ظلم.
  • العرق دساس.
  • عرق شنو؟.
  • أقصد الصلعة دساسة.
  • أكرم الهادي سليم علق ليك في الحكاية.
  • المسكين اتلخبط في (الصلع).
  • أكرم شاف سادومبا مرق قدام عيونه ..وقال يأخد نفسو شوية.
  • المكسين قال يرتاح في عضمو دا.
  • فجأة كدا قامت ظهرت ليه (صلعة) في المنطقة.
  • صلعة تانية.
  • أكرم الهادي سليم ..ما عرف يمشي وين؟.
  • ما عرف يسوي شنو؟.
  • أكرم الهادي سليم لمن يشوف ليه (صلعة) بيقعد يرجف كلو.
  • الصلع عملت ليه عقدة.
  • الخوفة الدخلها فيهو سادومبا عندما كان أكرم حارس مرمى للمريخ ، لغاية الآن ما طلعت.
  • بيني وبينكم (صلع) الطاهر سادومبا وإدوارد سادومبا ..ما عارف الحكم بفرزها ليكم كيف؟.
  • بقولوا (صلعة) إدوارد سادومبا أسرع شوية من صلعة الطاهر سادومبا.
  • صلعة إدوارد سادومبا بقولوا طيارة بس.
  • صلعة صاروخ.
  • وبقولوا صلعة الطاهر سادومبا بتطرف.
  • بتجلح.
  • بينما بتتوغل صلعة إدوارد سادومبا في العمق.
  • فلسفة (صلع) وكدا.
  • انتو عارفين..المشكلة ما في قون سادومبا الثابت.
  • المشكلة في شيبولا.
  • شيبولا – عمل ليك عملية في أكرم الهادي سليم قبل أن يسجل نزار حامد الهدف الثاني للهلال.
  • مسحو ليك.
  • أكرم الهادي سليم لغاية الآن لافي صينية.
  • طلع برة الاستاد وجاء راجع تاني.
  • أكرم مشى حتة…وشيبولا مشى حتة تانية خالص.
  • شيبولا يزلق فيهم زي الموز.
  • شيبولا ما شاءالله عليه.
  • يمين شيبولا يلم في صلاح نمر بي حالتو الأخيرة دي ..يعدمو ليكم نمر (النره).
  • يا أكرم معليش ..زي الواحد في الحتة دي عاوز يسأل سؤال.
  • زي عاوز أقول حاجة كدا.
  • معليش لو فيها شوية احراج.
  • بعد (زلقة) شيبولا …طعم نجيلة الهلال اتغير..وألّا نفس الطعم؟.
  • باقى إنت متعود على نجيلة الهلال.
  • بقيت خبير فيها.
  • قبل كدا سادومبا عمل ليك فيها تحليلات.
  • هسع بعد الجوهرة الزرقاء يا أكرم الهادي سليم ..نجيلة ملعب استاد الهلال قالوا طعمها بقى سكر ..سكر..
  • طعمها كيف عليك الله يا اكرم؟.
  • نحن كل ما نجيب لينا نجيلة جديدة ..اكرم الهادي سليم يقرضها لينا.
  • ينتهي لينا من الطبقة الأولى منها بسبب الزحلقة.
  • شيبولا زحلقو ليك زحلقة ما زحلقة نصاح.
  • اتاريني ..ماسك الهوى بي ايديا ..يا حبيبي ..ماسك الهوى بي ايديا.
  • أقصد ماسك النجيلة.
  • خلونا من غير (صلع) كدا ..ندخل على المباراة من الناحية الفنية.
  • بي صراحة الهلال ما قدم عرض جيد ، إلّا من بعض اللمسات ..المتفاوتة.
  • ظهرت ملامح جمالية في العاب شيبولا وكاريكا وسادومبا بشكل فردي.
  • لكن جماليات الأداء الجماعي كانت غايبة.
  • الأهلي الخرطوم شكل خطورة كبيرة على مرمى الهلال ، خاصة في كور أكرم الهادي سليم الطويلة وعكسيات عمر المصري.
  • حكاية الانتصار بفارق هدف …بتحرق الأعصاب وبتحفز الفريق الخاسر على تعديل النتيجة.
  • عشان كدا الأهلي الخرطوم كان يمكن يعدل النتيجة في أي لحظة.
  • خاصة من المخالفة التى ارتكبت مع خليفة على رأس المنطقة.
  • هذه المخالفة كان يمكن أن تكون هدفاً.
  • الحكم ذاتو كان ممكن يحسبها ضربة جزاء.
  • إلى جانب لعبات أخرى ..كان الاهلي قريب جدا من التسجيل منها.
  • مباريات البطولة قد لا تشترط الاداء ..في ظل البحث عن نقاط المباراة الثلاث ونحن في الامتار الاخيرة.
  • لكن حقيقة – أداء الهلال أمس كان يمكن ان يكون سبباً في ان يتعادل الاهلي الخرطوم مع الهلال.
  • هدف نزار حامد جاء في اللحظات الأخيرة.
  • هذا الهدف كان يفترض أن يأتي مبكراً بعض الشيء.
  • عشان نرتاح شوية ..ونعرف نشرب لينا موية.
  • خليتونا قاعدين المباراة كلها على أعصابنا.
  • نعاين في زمن المباراة متل (اللقيمات) الفي الصاج.
  • لا نريد أن نترك الهلال تحت رحمة الظروف.
  • الحكام ديل ذاتهم ما مضمونين.
  • يعني ممكن يعملوا ليهم أي حاجة يعدلوا بيها النتيجة.
  • الجهاز الفني ولاعبو الهلال عليهم الانتباه لذلك في المباريات القادمة.
  • فارق الهدف ..محرّض جيد للفريق المهزوم.
  • فارق الهدف ..بيجعل الفريق الفائز بيلعب تحت ضغط كبير.
  • والضغط بولد الأخطاء.
  • مكسيم لعب بمسؤولية وتعامل مع كل الكور التي وصلته بعقلانية كبيرة.
  • بلاتشي المدير الفني للهلال كان يشعر بخطورة المباراة – بدا عليه التوتر واضحاً.
  • لذلك انعكس التوتر على كل من في الملعب.
  • جماهير الهلال داخل الاستاد في المباريات الأخيرة أصبحت تشكل عاملاً سلبياً على لاعبي الهلال وذلك بإطلاق صافرات الاستهجان والاستعراض.
  • هذا الأمر – غير مقبول من جماهير الهلال.
  • فعلت جماهير الهلال ذلك والهلال يلعب أمام هلال الأبيض فخسرنا نتيجة المباراة.
  • صافرات الاستهجان ونحن نلعب في ملعبنا ..تمنح الخصم قوة كبيرة وتشجعه على مضاعفة الضغط والهجوم على الفريق.
  • لذا يجب أن تنتبه جماهير الهلال لذلك.
  • عندما ينخفض الأداء يفترض أن يرتفع التشجيع وتزيد المساندة والدعم.
  • أمر آخر – في غاية الأهمية.
  • ذلك الأمر هو الفرص السهلة التي اصبح يضيعها هجوم الهلال.
  • مدثر كاريكا وسادومبا وحتى شيبولا اضاعوا فرصاً سهلة كان يمكن أن تحسم نتيجة المباراة مبكراً.
  • مثل هذه الفرص – في المباريات الكبيرة لا تتاح بهذا الكم.
  • من فرصة ..يمكن حسم بطولة كاملة.
  • لذا يجب معالجة هذا الخلل.
  • نريد أن نفوز بهذه البطولة بفارق كبير من النقاط.
  • ونريد كذلك أن ندخل للموسم القادم بلا أخطاء.
  • ……….
  • ملحوظة : المشوار لسه طويل.

هوامش

  • نرجع لي الـ (17) طريقة التى يمكن أن يفوز بها المريخ بالممتاز بعد فارق الـ (9) نقاط.
  • نحن أمس كنا واقفين في ياتو طريقة.
  • ما عارفين طبعاً.
  • في طريقة يمكن أن تجعل المريخ يفوز بالممتاز …وهي أن تصبح (مدني) عاصمة انجلترا.
  • حاولوا.
  • أقول ليكم حاجة.
  • جيبوا ليكم (كديسة).
  • كحلوها بي شطة.
  • وشوفوا بيحصل شنو؟.
  • بي صراحة انتو ما عندكم أي أمل.
  • حالتكم متأخرة شديد.
  • قالوا ليك المريخاب الأيامات دي بيشكوا من صلاح نمر ..أكتر من السيول والفيضانات.
  • أي واحد فيهم يقول ليك العملها فينا صلاح نمر ..تاني ما بتطلع بالساهل.
  • ما بتمرق بي أخوي وأخوك.
  • صلاح نمر ..لو بيلعب في ريال مدريد.
  • بتوقع ليكم ريال مدريد ينزل التانية.
  • صلاح نمر في المريخ شايلنو الحكام.
  • مباراة الهلال القادمة أمام النيل شندي.
  • ما في مباراة ساهلة.
  • أي مباراة يجب الحذر منها.
  • ويجب حسمها مبكراً.
  • بعد مباراة النيل سوف يغادر الهلال بعد العيد إلى الفاشر.
  • مباريات الفاشر ..هي التي سوف تحسم الممتاز.
  • التركيز.
  • والحسم..أهم شيء.
  • المريخ سوف يلعب مباراته القادمة أمام هلال الأبيض.
  • نشوف أولادنا.
  • وبعد مباراة هلال الأبيض ..سوف يواجه المريخ الفريق المستهدف من الاتحاد العام فريق هلال كادقلي.
  • الأهلي الخرطوم أمس لعب كورة صافية.
  • التزموا بالأخلاق ..والانضباط.
  • أكرم الهادي سليم أيضاً لعب بروح رياضية كبيرة.
  • الروح الرياضية هي الاهم.
  • الخرطوم الوطني الذي فاز على المريخ ..سوف يواجه الهلال في الأسبوع قبل الأخير من الممتاز.
  • الخرطوم الوطني فريقه ما ساهل.
  • ما تقعدوا تضحكوا من ناس المريخ ساكت.
  • اعملوا حسابكم.
  • والدوري لسه.
  • وما في حاجة انتهت.
  • عودة بشة سوف تشكل اضافة للهلال في المباريات القادمة.
  • ونحن في انتظار شيبوب.
  • الهلال يجب أن يتحرك في موضوع التسجيلات منذ الآن.
  • الكاردينال في التسجيلات قبل الماضية حسم ملف ولاء الدين وعمار الدمازين وأبوعاقلة بذكاء كبير.
  • وجاء وحسم موضوع شيبوب في التسجيلات الأخيرة بذكاء أكبر.
  • وفي انتظار الكاردينال في التسجيلات القادمة.
  • في عهد الكاردينال ..الهلال أصبح يفوز بكل نجوم التسجيلات.
  • ………..
  • عاجل : صلاح نمر لو عارف الكلام دا كله بيحصل كان ضرب ليه حكم في البطولة الأفريقية مع ناس أمير كمال وعلاء الدين يوسف.

Share this