Test

هلال الأبيض ضبح قبل (5) أيام من العيد

9 سبتمبر 2016

أصلو ما بقدر أتخيل وليد بدرالدين دا غير انو بيذكرني ليكم بي الزول الرائحة ليه (شنطة) في صالة الوصول

يتخيل لي لو الحكم قام طرد صلاح نمر ..بنعتبر هلال الأبيض لاعب ناقص.. وناس ابراهومة ذاتهم ما بيقبلو بي الكلام دا

يمين الله الشيخ موكورو جاب ليه أقوان ..لو ما شلاقة صلاح نمر تلعبو في الدوري الانجليزي
 

الغريبة ان عمر محمود خالد شاعر (نهواه في كل الظروف)، عندو أغنية شهيرة عند محمد الأمين اسمها (خمسة سنين)

هلالابي ..عيونه متل (الجواب) مليانات كلام…قالوا ليه قول لينا (نشيد العلم) ، قرأ ليهم (جدول خمسة).

  •  
  • دخلنا ليك في ضفورنا.
  • عندنا هلالابي تاني عيونه متل (الدولاب) وقت تكون (الهدوم) فيه (منكشة) كدا – زي دفاع المريخ.
  • عندكم دفاع يا ناس المريخ ..ما فاضل ليه إلّا يضبح عديل كدا لمهاجم الفريق المنافس.
  • شيخ موكورو دا مالو معاكم؟.
  • انتوا كاتلين ليه زول..؟.
  • تقول شطبو جمال الوالي ..ما شطبو الكاردينال.
  • روسي قالوا ليه كورة المريخ انتهت خمسة.
  • الروسي قال ليهم خمسة والله لو (كورنرات) كتيرة عليهم.
  • بالمناسبة دي.
  • النضارة دي حقت منو؟.
  • او من غير مناسبة.
  • أحرار نحن.
  • نتكلم في اي شيء الليلة.
  • ان شاءالله نتكلم عن فيضان 1946.
  • خلوني أتحسس الحكاية.
  • اكتشف القصة.
  • بشرح ليكم الموضوع.
  • او ما بشرحو – علي كيفي..
  • عندنا دكان في الحلة ما فيه (طحنية)…في زول قال لي صاحبو ..انت ما عندك طحنية في الدكان ..فاتح ليك عيادة عيون.
  • ما عندك طحنية فاتح ليه؟.
  • احساس (الملاية المكرفسة) ..احساس بنتشارك فيه كلنا.
  • والولد الرأسو قوي ..اصلو ما بيسمع الكلام.
  • بفتح حلة الملاح ..ينشل منها (اللحمة) كلها.
  • وقت يجيبوا الغداء يقول ما عاوز.
  • والكمشة الواقعة في نص الحوش – دي حاجة حقتنا جميعا.
  • اصلو ما بننكرها.
  • والجدادة – لمن تترقب بيضتها ، وانت راجع من المدرسة.
  • الحكايات دي كلها ما بتتوافق مع الشيء البيعمل فيه صلاح نمر.
  • الزول دا تقول سجلوه في المريخ (خدمة الزامية).
  • البعمل فيه صلاح نمر دا …في افلام الكرتون ما قاعدين نشوفو.
  • امس صلاح نمر تقول شالوا ليه (الرئة)..قبل ما يخش الملعب.
  • الزول دا تقول داخل الملعب شايل ليه (فلنكة).
  • تقيل جنس تقل.
  • وكمان بتلفت.
  • صلاح نمر – ليه وقت يقوم جاري بيجري عكس حركة كرعينه.
  • هو في اتجاه ..وهن في اتجاه.
  • قلت ليكم قبل كدا.
  • يعني (صلاح) بيجري على اتجاه ..و (نمر) بيجري على اتجاه آخر.
  • ما عندو اي علاقة بالاتجاه الاول.
  • ديل تاني (اطلس العالم) ما بيلمهم.
  • صلاح نمر دا وقت يكون ماشي الدكان ..يتخيل لي بمشي ليه مركز صحي.
  • ووقت يكون ماشي الجريف ..بيركب مواصلات الصافية.
  • وقت يكون عاوز يفطر بجيب العشاء.
  • الزول دا مالو؟..عاوز يشقنا بالفرحة.
  • عندنا (عناقريب) وقت المريخ يتغلب ..بنجي نلقاهن اتفرشن براهن.
  • وعندنا عنقريب (شليق) جنس شلاقة – من الفرحة بيبقى (سرير).
  • وعصير الليمون من غير ما نشعر بنلقاه بقى عصير اناناس.
  • خلوني ما امرق ليكم من الموضوع.
  • شاعر اني كل مرة بطلع برة من الفرح.
  • متل (حوش المناسبة)…تلقى الشفع مجدعين فيه متل قزاز البيبسي.
  • الغريبة الليلة (الخميس).
  • عارف الموضوع فيه احراج ليكم.
  • عارفكم بتتعقدوا من السيرة دي.
  • يمين الله الشيخ موكورو جاب ليه أقوان ..لو ما شلاقة صلاح نمر تلعبو في الدوري الانجليزي.
  • ومهند الطاهر تقول قايل نفسو بيلعب في الهلال الكبير.
  • الزول دا في اي كورة بيعمل ليه (محاضرة) جانبية.
  • بفتح ليه فرع.
  • الشيخ موكورو فرع صلاح نمر.
  • موكورو فرع وليد بدرالدين.
  • موكورو الفرع الرئاسي الخرطوم.
  • في لاعب في المريخ اسمو وليد بدرالدين ..الزول دا يتخيل لي لو قاعد في المقصورة ممكن يكون ثغرة في دفاع المريخ.
  • شارع.
  • أول مرة أشوف لي مدافع شغال بي نظام قطار البخار.
  • الزول دا جبتوه من وين؟.
  • السجلو ليكم منو؟.
  • اصلو ما بقدر اتخيل وليد بدرالدين دا غير انو بيذكرني ليكم بي الزول الرائحة ليه (شنطة) في صالة الوصول.
  • اما صلاح نمر ..فحكايتو حكاية.
  • بيشهيكم بلة جابر.
  • ح تقولوا يا حليل موسى الزومة.
  • الدكوة واضحة في تصرفات صلاح نمر.
  • الزول دا كورتو (دكوية).
  • يتخيل لي لو الحكم قام طرد صلاح نمر ..بنعتبر هلال الابيض لاعب ناقص لاعب.
  • ناس هلال الابيض ممكن يحتجوا عديل كدا لو الحكم قام طرد صلاح نمر من المريخ.
  • الزول دا نجم المباراة الحقيقي من جانب هلال الابيض.
  • لا مهند الطاهر.
  • ولا الشيخ موكورو.
  • الخدمة القدمها صلاح نمر لهلال الابيض ..الشيخ موكورو بي اقوانه التلاتة ما قدمها لهلال التبلدي.
  • ما عارف ليه صلاح نمر بيديني إحساس الزول البدك حصة الرياضيات.
  • وبدك حصة العربي.
  • وبدك حصة اللغة الانجليزية.
  • وبدك حصة الدين ذاتو.
  • نحن الفرحة وقت يجيبوها لينا قاعدين نجيهها.
  • بنشيل ليها (اللوز).
  • ونفتح ليها قلوبنا (صالون).
  • نفتح ليهم شبابيك الاذين الايمن.
  • ونعمل ليهم صماماتنا (مراوح).
  • عيونا بقت (رواكيب) مفتوحة لي كل الناس.
  • فرشناها ليكم بي ملايات جديدة.
  • وركبنا ليها ستائر خضراء.
  • ما عارف ليه ستائر خضراء؟.
  • المهم.
  • يمكن كلمة وقعت مني من غير ما أشعر.
  • الموية الباردة من غير ما تشربها – بتحس بيها.
  • تقعد تتمطق كدا ..بينك وبين لسانك.
  • تخش وتطلع.
  • تمرق وتقيف.
  • واي (امجاد) تمر فيك تقعد تعلق عليها.
  • الناس دي طايرة كدا ماشة وين؟.
  • لاحقين شنو؟.
  • ما قادر اتخيل الحكاية.
  • ما عاوزة تقع لي.
  • كل ما يقولوا لي المريخ اتغلب (خمسة).
  • موضوع الهلالابي العمل جدول خمسة النشيد الوطني ..ما عاوز يطلع من رأسي.
  • بطوحل لي زي (العضم).
  • الايامات دي الواحد كلامو كلو لحم – لحم.
  • ما قادر اتخيل الشيء دا.
  • إلّا اطلع من شعوري أقلب الهوبة برة في السهلة واجيكم راجع.
  • أمرق من احساسي…
  • اشم لي هواء نضيف..
  • كمان يا الهلالاب عاوزين تختوا جدول (5) في محل السلام الجمهوري.
  • مخير الله.
  • يعني الرئيس الصيني يجيكم من بكين …تعزفوا ليه جدول خمسة.
  • اتخيلوا المنظر دا.
  • زولكم جاكم من الصين ..تعزفوا ليه جدول خمسة.
  • انتوا قايلنو صلاح نمر.
  • والله يا صلاح نمر ..نمرك دا الظاهر عليه (صيني).
  • بيشتغل بي حجارة البطارية.
  • الرئيس الصيني ممكن ما يفهم حاجة في جدول خمسة (ممكن يمشّي ليكم الموضوع)..لكن عليكم الله حركاتكم دي اوعكم تعملوها لينا قدام رئيس عربي.
  • بتحرجونا.
  • بدخلونا في حتة ضيقة.
  • جدول خمسة ما بيأكلكم عيش.
  • الغريبة ان عمر محمود خالد شاعر (نهواه في كل الظروف) ، عندو اغنية شهيرة عند محمد الامين اسمها (خمسة سنين).
  • خمسة سنين شنو؟…الكلام دا كلو حصل في (90) دقيقة.
  • شيلوا (نهواه في كل الظروف) وركبوا (خمسة سنين).
  • جيبوا ليكم شوربة عدس اتغوغروبة.
  • شوربة العدس خلوها.
  • اعملوا ليكم بليلة عدسي..
  • ما تقيفوا لي كدا.
  • اتحركوا اتصرفوا.
  • افتحوا المراوح..
  • شغلوا المكيّف..
  • ما تنحوا لي كدا..
  • جيبوا ليكم كباية شاي ..وصحن قزاز كبير …كسروهم.
  • ارموهم في الواطة دي.
  • اخبطوا بيهم الحيطة.
  • نحن مقدرين الحالة.
  • اتفشوا في الكبابي.
  • اكسروا لمبة الحوش.
  • دفقوا موية الصبارة.
  • افتحوا الحافلة ..طلعوا ليكم منها طقم عشاء…اخبطوا بيه الواطة.
  • اتفشوا..
  • ما تقعدوا لي كدا ..بتموتوا فيها.
  • أصلكم ما بتقدروا تقولوا حاجة لي جمال الوالي.
  • ولا بتقدروا تقولوا حاجة لي عبدالصمد.
  • اتفشوا في العدة.
  • ظهروا شخصيتكم.
  • خمسة – دي نحن في ملاعب الخماسيات بقينا ما قاعدين نسمع بيها.
  • تجوا يا ناس المريخ بـ (28) عضو …تتغلبوا خمسة.
  • فضيحة السواد.
  • لاعبين سيجة..
  • ضمنة.
  • انتوا شالوا ليكم (الركب) برة.
  • مالكم؟.
  • الحاصل عليكم شنو؟.
  • بص الوالي كسر عمود.
  • كسر عمود شنو؟.
  • بص الوالي دخل ليه في عمود.
  • يمين …بصكم دا وقع في البحر عديل كدا.
  • اقول ليكم..عشان تبقوا عارفين.
  • الزول البيضبح قبل (صلاة العيد) ما عندو (ضحية).
  • ويمكن نقول ما عندو عيد.
  • الزول البيضبح قبل (5) ايام من العيد – موقفو كيف؟.
  • بالغتوا يا ناس هلال الابيض – السنة دي عاوزننا نعيد بـ (التبلدي).
  • ضبحوا لينا (تبلدية).
  • ناس هلال الابيض – شوف عيني دي ..(شيتهم) طلعت قبل ما يضبحوا (الخروف).
  • الشربوت ما هو المشروب الرسمي في العيد.
  • المشروب الرسمي للعيد السنة دي (التبلدي).
  • خليتونا نطلع حلاوة العيد من قبل 5 ايام من العيد.
  • نقسم في الكعك.
  • ونفرش في الملايات.
  • ونركب في الستائر.
  • الشفع …حايمين من بيت لي بيت ..بيباركوا الخمسة لهلال الابيض.
  • وضعتونا في موقف محرج.
  • والله بي طريقتكم دي ..لا بنقبل بيكم (وصيف) لينا ولا حاجة.
  • شرطوا عينا.
  • احرجتونا.
  • المباراة دي طبعا لو سمير فضل عاوز يعيدها ، إلّا يشوف ليه (مطرة) في كوستي او الابيض او الدامر يعيد بيها المباراة.
  • غير كدا..والله في النيلين ما نعيدها ليكم.
  • ……
  • ملحوظة : الخمسة دي لو في اتحاد صاح ..تنزلكم التانية.

هوامش

  • مهند الطاهر لو لعب براهو ..بيغلب المريخ.
  • والشيخ موكورو ..واضح كدا عندو مشكلة شخصية مع المعز محجوب.
  • فكروا اتخلصوا مع الفريق دا واعملوا ليكم مول تجاري.
  • الخمسة كتيرة.
  • ما حصلت.
  • وكمان في استادكم.
  • فضيحة السواد.
  • التاريخ سوف يسجل ذلك لمجلس جمال الوالي وعصام الحاج وعبدالصمد والفريق طار ومزمل ابوالقاسم.
  • المجلس ابو (28) عضو.
  • بص الوالي شتت.
  • ………..
  • عاجل: الخمسة دي عاوزة ليها (شربوت) كاااارب كدا.

Share this