المريخ سهر وهزيمة كان أحسن تساهروا بـ (ضرس) من أن تساهروا بـ (ضفر)

أيمن سعيد لو اتفرغ لتجارة (الشطة والكركدي والتبلدي) أحسن ليه لو دي كورتو

 

هدفكم في الاتحاد يا مريخاب إلّا يحسبوا ليكم (فيصل سيحة) يوم الجمعة القادمة

""""""""""""""""""""""""""""""""""

من الغلاف للغلاف : يحررها محمد عبد الماجد عند اللزوم فقط 

الإهداء 

طبق البيض (30) جنيه.

كيلو اللحمة ضان (75) جنيه.

الرغيفة الواحدة بي واحد جنيه.

تركيب الطبق بـ (35) جنيه.

تذكرة السفر لمدينة شندي (55) جنيه.

العجورة بـ (5) جنيه.

علبة الزبادي الكبيرة (8) جنيه.

كيلو البامية (20) جنيه.

كيلو الطماطم (20) جنيه.

(السلام عليكم) بـ (12) جنيه.

هسع دا (إهداء) ليك.

يا جماعة الدنيا رمضان أي حاجة أقولها ليكم فوّتوها.

ما تقيفوا لي على الواحدة..

الليلة عندنا مباراة.

محمد 

 كورة معكوسة 

واحد قاعد يلخبط بين عيد الفطر وعيد الضحية.

قالوا ليه يا زول عيد الضحية فيه (اللحم)...الموضوع واضح..أصلو ما في سبب يخليك تلخبط بين العيدين.

قال ليهم والله  يا جماعة لي (13) سنة بعيّد عيد الأضحى بدون (لحم) ما قاعد أشوف لي فيه (لحمة).

عضم ما شفتو.

واحد تاني خالص – قال لي والله ما في حاجة بتريحني في عيد الفطر ..إلّا لأنو ما فيه (تبرعوا بجلود الأضحية).

لكن السنة دي ما مضمونة..يمكن جماعتنا ديل يقولوا لينا اتبرعوا بجلود الأضحية.

نحن ذاتو طلعنا ضحايا.

 

حكمة 

بيت أبوك لو خرب – قول ليهم دي من (المطرة) التى أعلن عنها ناس الارصاد ..وما شفنا ليها (نقطة).

السنة دي ناس الارصاد ..رمضان داخل عليهم شديد...ما عندهم مطرة صدقت أصلو.

انتوا يا ناس الارصاد لو بتسكتوا ما في زول بيسألكم.

علاقة السيلفي بالقمل شنو؟..لو ما حركات روس منكم ساكت

أغرب خبر قرأته هذه الأيام: 

(حذرت وكالة حماية المستهلكين الروسية ، (روسبوتريبنادزور) ، من أن صور (سيلفي) أي الصور الملتقطة ذاتياً بواسطة هاتف ذكي، هي من أسباب انتشار القمل في صفوف الأطفال والمراهقين، ناصحة بوضح حد لهذه الممارسة.

وقالت الوكالة إن (انتشار القمل لدى المراهقين مرده بحسب خبراء إلى الإقبال الكبير على التقاط صور (سيلفي). وهذه الصور التي قد تجمع أحياناً شخصين أو أكثر (تسهل انتقال هذه الطفيليات بسبب قرب الرؤوس من بعضها البعض).

وشددت (روسبوتريبنادزور) على أن (هذه هي الطريقة الرئيسية لانتقال القمل) بين الأطفال والمراهقين مشيرة إلى أن الأطفال الذين يعانون من القمل يجب أن يعزلوا حتى لا ينقلوها إلى رفاقهم.

ويشهد التقاط الصور على طريقة (سيلفي) بواسطة هاتف ذكي ، رواجاً كبيراً في روسيا).

دا الخبر طبعاً ...ما قاطعة ليكم من رأسي ...جايبوا ليكم من الموقع – أكيد عاوزين تشوفو (التعليق).

أول حاجة طبعاً قلت الروس ديل ما عندهم موضوع – علاقة القمل بالسيلفي شنو؟.

بس عاوزين يدخلوا (السيلفي) في الموضوع.

لكن لمن قريّت الخبر ..اقتنعت شوية كدا ..ولقيت كلامهم فيه شوية منطق.

لكن برضو دي ما قضية.

وكالة (روسبوتريبنادزور) لو شافت ليها شغلة تانية يكون أحسن ليها.

القمل أخير لينا من البعملوا فيه دا.

السؤال الغريب – والما واقع لي ...الروس عندهم (قمل).

اتخيلوا (قمل) روسي ..أكيد حجمو كبير ..زي العقارب.

والله – الروس طلعو أي كلام ...انتوا وقت عندكم (قمل) يبقى فرقكم من التانين شنو؟.

 

تحذير 

لو جاتكم مطرة ..ما تهاجموا الوالي الحالي ..هاجموا الوالي السابق ..الوالي الجديد لسه ما دخل (الفورمة)..وما عندو قضية بي أي (مطرة) تهطل.

 

الكلمة ومعناها

في زول سألوا صاحبو وقال ليه أنت تعال هنا (الجدادة) من الطيور ولّا من الحيوانات؟.

صاحبو قافلة معاهو شديد ...قال ليه والله ما عارف لكن المرة الفاتت مشيت (سوبر ماركت) لقيتهم واضعنها في جناح (العطور).

 

...

 

فكرة 

فريق سموحة بيشكي من (الطقس)...قالوا الطقس حار جداً.

طيب أنتوا لو شفتوا (الشغيل) تقولوا شنو؟.

الشغيل مولع نار.

لو شفتوه ما بتقولوا كلامكم دا.

 

إسعاف 

مكوجي ..الشغل كتر عليه قبل العيد ...علق على باب المحل ...الرجاء تقديم (الرقم الوطني) و (4) صور وشهادة إخلاء طرف من الخدمة الوطنية قبل تسليم (الملابس).

 

شاحن جلاكسي 

أي زول في البلد دي بقى عندو جلاكسي وصلعة ورأي في الحكومة.

الصلعة عرفنها.

الرأي شنو كمان؟.

 

احتمال 

صلاح إدريس الأيامات دي خلى أعماله وخلى الأهلي شندي والتلحين ومسك في (يوسف السماني).

يكون صلاح إدريس عاوز يعمل ليه إذاعة رياضية خاصة بيه.

أصلو الهجوم دا ما ساكت.

 

شيالة حلاوة

المريخ بقى يسافروا معاهو بره البلد ناس بخيت خميس وسيلا وعمر بخيت ويقعدوا هنا ناس أحمد الباشا وبله جابر.

المريخ بقى زي الزول العندو (شريحتين) وشغال بالتلفون الثابت.

عمر بخيت في مباراة المريخ والاتحاد ...المباراة كلها فاكرو (الحكم الرابع).

قلت للناس المعاي – الحكم الرابع الدخلو جوه شنو؟.

الناس ديل جنو؟.

 

صينية خبيز 

الحمدلله ظاهرة (الخبيز) للعيد اختفت.

زمان زي الأيامات دي ...الشوارع كلها بتلقاها حائمة (صواني خبيز).

غايتو المسلسلات التركية دي لو فيها فائدة ..تبقى في أنها مسكت النسوان وخلنهن ما عندهن وقت للخبيز.

زمان العيد لو ما خبزوا ليه ما بجي ..حتى لو رمضان جره لي رمضان السنة التانية.

 

اقتراح

رمضان القادم باقي ليه 11 شهر و4 أيام فقط.

تتخيلوا عندنا ناس في الحلة ...الأيامات دي بيعوسوا في (الحلو مر).

 

نظرية 

قالوا ليك غارزيتو سألوه – قالوا ليه أنت ليه ما قاعد تلّعب (بله جابر) وتشركه في المباريات.

غارزيتو قال ليهم بله جابر لمن يتقدم ما برجع.

بله جابر عاين ليه كدا ..وقال ليه أنا لو برجع يا كوتش كنت لعبت في الهلال ..ما كان لعبت مع ناس ضفر ديل.

برضو منطق.

 

صفيحة دغالة 

أنتوا ليه الزول بقدر يقول السنة دي رمضان سخن.

والسنة دي رمضان مولع نار.

والسنة دي رمضان صعب.

والسنة دي رمضان دخل في العضم من أول يوم..وما بقدر يقول الموية والكهربة قاطعة طول اليوم.

فلاحتكم بس في رمضان!!.

 

واسطة 

في البلد دي أسهل حاجة تبقى (فنان).

إذا كان السر أحمد قدور أي زول بفتح خشمو بقول ليه (هائل) كيف ما تبقى البلد كلها فنانين.

إذا كان طه الضرس (هائل)...السر أحمد قدور لو سمع عثمان حسين ح يقول ليه شنو؟.

أكيد ح يطلع لي فاصل إعلاني وتاني ما يرجع.

لكن قطع شك.

ومن غير أي كلام.

ولف دوران.

السر أحمد قدور الليلة لو شاف نصر الدين الشغيل ...ح يقول ليه : (والله هايل يا الشغيل).

 

ملحوظة 

أغاني وأغاني السنة دي زي العطلة الرسمية البتقع جمعة.

ما بتستفيد منها أي شيء.

 

كرتونة حروف نصب

في موضة (حرامية) الأيامات دي ..يقولوا ليك تلب لينا حرامي لقط الموبايلات كلها – ما خلى ليه (شاحن) واتخارج.

الحرامية ذاتهم بقوا (تخصصات).

الواحد يتلب ليه حيطة ويجي الساعة اتنين صباحاً عشان يشيل ليه (شاحن موبايل) ويتخارج.

حليل حرامية زمان..كانوا وقت يتلبوا ليهم على بيت لو ما كتلو ليهم زول ما بيجوا طالعين. 

الحرامية انتهوا.

حرامية آخر زمن.

 

ارنب نط 

عبد الصمد نائب رئيس نادي المريخ ..يستقيل خميس وجمعة.

ويرجع خميس وجمعة.

زي الزول المن الجزيرة وشغال في السوق العربي ...لازم كل خميس يمشي (مدني) ويجي راجع يوم الأحد الصباح بدري.

الرقم مشغول 

يا ناس بي ان سبورت ..عليكم الله الليلة أي حركة يعملها أو يقوم بيها (نزار حامد) حولوها لينا طوالي للقنوات النقالة للدوري الأسباني.

افصلوا لينا حركات نزار حامد من دوري أبطال أفريقيا.

البعمل فيه نزار حامد دا – ما شغل دوري أبطال أفريقيا.

الكلام دا أكبر من كدا...ما تخمونا ساكت.

 

خطين تحت الجواب 

كل ما أتابع لي حلقة من برنامج (شق الديار) أقول طيب ناس قناة النيل الأزرق ديل لو عندهم (حملة تطعيم) ....نانسي عجاج لزومو شنو يسوقها معاهم.

والله الموضوع دا ولا عاوز حتى (سعد الدين حسن).

الموضوع دا (إسراء سليمان) ممكن تقوم بيه.

تسلل

ناس المريخ قالوا عندهم قون الحكم ما احتسبوا ليهم.

الكورة طلعت بره الملعب ...وجات راجعة – عاوزين الحكم يحتسبو ليكم.

هدفكم دا إلّا يحسبوا ليكم فيصل سيحة يوم الجمعة القادمة في عالم الرياضة.

هدفكم دا عاوز جهاز رضا مصطفى الشيخ ومونتاج وأسبوع (تحميض) عشان يحسبوهوا ليهم.

 

غارزيتو قال أمام اتحاد العاصمة الجزائري ح ألعب (مهاجم).

ما شفنا ليه أي هجوم غير الهجوم الذي كان على حكم المباراة.

بكري المدينة وأيمن سعيد يقابضوا في (الحكم) متل الزول المسافر في موقف شندي ..أول ما تدخل الموقف ..يحاوطوك عشرين كمسنجي.

شولة هندية 

حفيظ الدراجي قال هدف المريخ في الاتحاد صحيح...الدراجي دا (سيحة) الجزائر.

الحركات دي نحن حافظنها كويس.

 

فروقات 

المريخاب ساهروا للساعة اتنين ونص صباحاً ...وطلعوا بعد دا مغلوبين...سهركم دا على الأقل كان تتعادلوا ليه.

سهر وغلب مرة واحدة.

نحن لو ساهرنا للساعة اتناشر على الأقل بنغلب أربعة.

نحن ما عندنا سهر ساكت.

نحن شفوت.

نحن صعبين.

بعدين يا مريخاب ..عشان الكلام يبقى ليكم واضح ...أحسن الواحد يساهر ليه بي (ضرس) من أن يساهر بي (ضفر).

ساهرتوا في الفاضي ساكت.

الكشافات نفر 

بله جابر قالوا ليك قاعد يتابع في مباراة المريخ والاتحاد ..سألوه قالوا ليه رأيك شنو في هدف المريخ الملغي.

قال ليهم المريخ مفروض يتغلب خمسة.

القوائم براها طلعت ليها هدفين.

طاقية حايمة

ديديه وبكري المدينة في هجوم المريخ ...زي الناس الحايمة وما لاقيه ليها (حجز).

لافين ساي.

ديديه دا لو دي كورتو أحسن من تراوري بي عدم لعبو.

زعل تراوري ولا مشاركة ديديه.

غايتو يا ناس المريخ بتجيبوا ليكم في ناس....الواحد فيهم زي فني الصوت البيظهر في بداية الحفلة ويختفي.

 

دفاع المريخ في (الكنبة) ووسطه في خط الدفاع

في المريخ المدافع علي جعفر.

وفي المريخ المدافع الريح علي.

وفي المريخ المدافع سيلا.

مع ذلك دفاع المريخ بلعبوا فيه لاعبين من خط الوسط – أمير كمال – علاء الدين يوسف – وسالمون.

نوع دا يقولوا عليه شنو؟.

يلعبوا لاعبو الوسط في دفاع المريخ ..بينما لاعبو الدفاع يقعدوا كنبة أو من الأساس ما يسافروا مع الفريق.

الغريبة المدافع الوحيد البلعب في المريخ هو (ضفر).

وضفر ذاتو ما بلعب في الدفاع – ضفر بيلعب قدام.

غارزيتو شقلب ليك المريخ دا جنس شقلبة.

بكري المدينة ليه حق يتشقلب كدا.

بكري لو ما اتشقلب بلقى نفسو بيلعب مساك شمال.

 

أجب بلا أو نعم 

المريخ تاني ما عندو نقاط غير نقاط (العلمة) الفريق الذي يلعب في الدرجة الثانية؟.

والمريخ برضو تاني ما عندو هدف – غير الهدف الملغي الذي سجله في شباك الاتحاد وتم إلغاء الهدف – عشان الكورة جات من بره.

 

شوية زعل 

فريق سموحة ..فهمو كملو في الشكية من (الطقس).

شوفوا الفريق لمن يكون عاوز يتغلب وما عندو قدرة ..بقوم يعملها شكية كدا.

الجماعة ديل من نزلوا بيشكوا من (الطقس).

مع الاعتذار للأغنية 

بتتعلم من الأيام مصيرك بكره تتعلم وتلعب (طرف شمال).

 

قصة قصيرة جداً 

زمان الواحد يتجرأ وبمشي يطلب يد بنت الجيران.

هسع لو اتشجع شديد واتحمس خالص ..وكمّل الفهلوة ما بطلب اكتر من (شاحن) الجلاكسي.

 

هدف – هدفين – تلاتة ما بفطرونا في (سموحة) عاوزين (أكتر)

كتبت كثيراً ..وذكرت أن فريق (سموحة) يعاني من (فوبيا) الجماهير – وهو أضعف ما يكون أمام الجماهير ..باعتبار أن الفريق يلعب بدون جمهور لأكثر من أربعة مواسم.

كل عناصر الفريق الحالي لم يسبق لها اللعب في حضور الجماهير بسبب أحداث الثورة في مصر والتى أفرغت المدرجات من الجماهير.

عليه فإن التركيز يجب اليوم أن يكون تركيز (جماهيري).

سموحة بالكواريك ساكت ممكن ياخد خمسة.

فريق سموحة عند الضغط هو فريق ضعيف جداً – لكن لو لقى فرصة ومنحناه المساحات والوقت ممكن يعمل الكتير.

اجعلوهم في ضغط مستمر ..إن لم يكن الضغط داخل الملعب يفترض أن يكون الضغط في المدرجات.

يجب أن تصمت جماهير الهلال ..عليها أن تهتف طوال التسعين دقيقة ..كوركوا في الجماعة ديل ..عشان تهزموهم هزيمة كبيرة.

يمكن أن نجعل حلم سموحة في التأهل ..ينتهي الهلال وذلك بتحقيق أكبر انتصار في المقبرة اليوم على سموحة.

هدف – وهدفين ..وتلاتة ما بكفونا.

ولا بنقبل نفطر بعد صيامنا دا بي هدف أو هدفين.

عاوزين ننزل أكبر انتصار اليوم ..وهذا ممكن ومتاح إذا حضرت جماهير الهلال وتدافعت وشجعت.

ارهبوا فريق (سموحة) إرهاب قانوني بعيد من التجاوزات والانفلاتات ...الدنيا أصلاً رمضان ..يعني ما ح يكون في أي خروج.

ح نلعب بي روح رياضية.

ونشجع بي روح قتالية.

الروح القتالية بتطلع من (المدرجات)..بتظهر من الجماهير ..وبفرضها أولاً الجمهور.

لا نريد أن نحترم فريق سموحة أكثر مما يجب.

فريق سموحة يعاني ..الفريق حتى الأسابيع الأخيرة في الدوري المصري كان يعاني من شبح (الهبوط).

موقع الفريق في روليت الدوري المصري ...موقف يثبت أن الفريق ليس مخيفاً – فلا تجعلوه بعبعاً.

والبخاف من العفريت بطلع ليه.

فريق سموحة يعاني من إشكاليات عديدة ..رئيس النادي دخل في خلافات وصراعات مع كل الأجهزة الفنية التى أشرفت على الفريق.

اختلف مع حمادة صدقي بعد نجاحاته الكبيرة الموسم الماضي وهو يقود سموحة إلى وصافة الدوري المصري ووصافة الكأس.

وجاء رئيس النادي عامر فرج واختلف كذلك مع المدير الفني السابق لسموحة حمدي طولان رغم من أنه قاد الفريق في ظروف صعبة إلى مرحلة المجموعات.

وأكمل رئيس النادي السكندراني تخبطاته عندما وصل باختلافه مع قائد الفريق ولاعبه المميز إبراهيم عبد الخالق.

إذن كل عناصر تحقيق انتصار كبير للهلال اليوم متوفرة بإذن الله.

خبرة الفريق وحداثة عدها في البطولة الأفريقية ..يجعلنا نطالب من جماهير الهلال أن (تقبر) ضحيتها في الفريق.

الضحية مروضة ..وما في أي مشكلة.

ممكن الهلال في خلال ربع الساعة الأولى من عمر المباراة ينهي الجولة ويحقق انتصار كاسح على الفريق المصري.

 

بتوع (الشطة) ظهروا 

زمان قلت يا ربي أيمن سعيد بسافر مصر كتير ليه ..زي عصام الحضري ومحمود سعد وعصام الحضري ومصطفى يونس ..(تجار الشطة).

هسع وقت شفت كورة أيمن سعيد ..واللخبطة البعمل فيها ..اتأكدت أن أيمن سعيد بمارس في نفس الشيء.

أيمن سعيد ..أحسن ليه يتفرغ بعد كدا لتجارة الشطة والكركدي والتبلدي.

الضرب والهمج البعمل فيها دا ...ما ضرب لاعب محترف.

دا ضرب زول بتاجر في الشطة والكركدي والتبلدي.

عليكم الله هسع البشوف وسط الهلال بشه والشغيل ونيلسون ونزار حامد ..بشوف وسط المريخ عمر بخيت وأيمن سعيد.

 أكرم الهادي سليم على طريقة (رامز واكل الجو)

تداولت المواقع الاجتماعية تسجيل (وهمي) كدا ..قاطعو أكرم الهادي سليم (الممثل) الأكبر ..التسجيل احتوى على مكالمة مع (ريس) قاطعو أكرم الهادي سليم والناس الخططوا ليه من راسو.

طيب أنت ما تقول اسم الريس.

في زول في الدنيا يا جماعة بيستقبل ليه مكالمة تلفونية من غير ما يعرف الطرف التاني البتكلم معاهو منو؟.

في زول بتكلم ليه مع زول ما بقول اسمو.

لو الحكاية ما مدبلجة وما مخطط لها ..كان يفترض أن يقول أكرم الهادي سليم اسم الزول الذي اتصل معه ولو بطريقة عفوية.

قولوا ما قال اسمو ..هل يستطيع أكرم الهادي سليم أن يعلن عن اسم الزول الذي اتصل به.

خلوه يقول اسم الزول الذي طالب منه أن يحافظ على نظافة شباكه أمام المريخ وعرض عليه 25 ألف جنيه.

نحن عاوزين نعرف اسم الزول دا منو؟...لماذا التستر عليه ..يجب إذا كان هناك شخصاً بهذه الصورة أن يبعد من الوسط الرياضي.

قولوا اسمو...إلّا إذا كان ذلك المتصل من المعارضة بتاعة المريخ ..عشان كدا بتكتمو على اسمو.

الشيء المضحك أن الكل ..وأي زول عارف أن أكرم الهادي سليم لن يشارك أمام المريخ ..الحاجة دي معروفة.

يعني ما في زول مخبول في راسو كدا ..ممكن يعرض ليه (25) ألف جنيه لي أكرم الهادي سليم وهو أصلاً لن يشارك في المباراة.

من بعد فإن الاتصال هذا يشكك في أكرم الهادي سليم ويفضحه إذا اعتبرنا صدق المكالمة وحقيقتها ..لأن إداري يتصل بلاعب كورة ويتكلم معه بهذه اللغة  لابد لها من أن يكون مجرب العملية قبل كدا.

وعارف قبول اللاعب لمثل هذه الحوافز ..بمنع التسجيل أو فتح الشباك لاستقبال الأهداف.

أكرم الهادي سليم يبدو أنه اتأثر برنامج (رامز واكل الجو) والذي ننقل لكم منه هذه التفاصيل والأخبار نقلاً عن بعض المواقع عشان أكرم الهادي سليم ..يعرف أن (رامز جلال) برنامجو ذاتو اتكشف.

جاء في أحد المواقع : (يتابع الجمهور العربي في شهر رمضان لهذا العام، أكبر برنامج ترفيهي في الشرق الأوسط “رامز واكل الجو” على شاشة أم بي سي، ليختلف المشاهدون حول مصداقية تلك المقالب، إذ يقوم البرنامج على دعوة الفنانين لحضور افتتاح فندق جديد في دبي، وتقوم مقدمات الحفل بدعوة الفنان إلى الطائرة لمشاهدة الفندق من الأعلى، وهنا تبدأ المغامرة حين تبدأ الطيارة بالترنح يميناً وشمالاً ويلقي الكابتن إشارات الإنذار ويطلب من الجميع القفز من الطائرة. بعض المشاهدين لم يصدقوا أن تكون تلك المقالب حقيقية، إذ أن هناك بعض الفنانين الكبار بالعمر وأن تعريض حياتهم للخطر، سيعرض رامز واكل الجو لمساءلة قانونية، وهو لن يخاطر بذلك ما لم يكن الفنان موافق على المقلب بشكل مسبق. كل تلك الشكوك تأكدت، حينما كشفت إحدى مذيعات البرنامج “جوري بكر” وبطريقة غير مباشرة أن المقالب التي يتم تنفيذها في الفنانين متفق عليها بشكل مسبق، إذ كتبت جوري على حسابها: “لوسي حبيبتي، على قدم أنا عارفة أنه تمثيل، بس عيشتيني في حالة رعب، بس بموت فيكي، الضحية الثانية”. ولكن عندما تفاجأ القراء بعد لحظات قليلة، قامت جوري بتعديل الجملة وقالت: “لوسي حبيبتي على قد ما أنا عارفة أنه أنا اللي بمثل عليها بس عيشتني في حالة رعب، بس بموت فيكي، الضحية الثانية، يا جماعة والله العظيم النجوم بيجوا وبيكونوا مش عارفين أي حاجة، مع احترامي شكراً” يُذكر أن الفنانة لوسي كانت هي الضحية الثانية لبرنامج (رامز واكل الجو)، بعد حلول الفنان محمد هنيدي ضيفاً على الحلقة الأولى، وسقطت لوسي أرضاً إثر المقلب العنيف الذي أغضبها وأخافها). 

وجاء أيضاً على ذات النسق : (تداول عدد من نشطاء مواقع التواصل الاجتماعي، مقطع فيديو من حلقة هشام عباس في برنامج “رامز واكل الجو” ، وفيه يقول هشام لرامز داخل الطائرة “يا رامز سيب باقولك”، أي أنه كان يعلم بالمقلب وأن رامز جلال هو من يجلس بجواره، واعتبر النشطاء أن هذا الخطأ العفوي من هشام أكبر دليل على فبركة حلقات البرنامج، إلا أن الفيديو لم يعد متوفراً بعدما تم حذفه عن مواقع التواصل أثناء انتشار الخبر. كذلك كان هناك خطأ آخر في حلقة عبد الله مشرف عندما نطق باسم البرنامج بمجرد نزوله من الطائرة وقبل أن يخبره به رامز جلال. يذكر أن برنامج “رامز واكل الجو” واجه هجوماً شرساً من عرضه على ام بي سي مصر بعد اتهامه بفبركة الحلقات، وعرض ألفاظ خادشة للحياء، واتهامات بالتحرش بالعالمية باريس هيلتون، مما دفع ولي عهد دبي لحذف اسمه من تتر البرنامج).

لكن للأمانة برضو – نقول إن رامز جلال والمجموعة المنفذة للبرنامج نفت هذه الأخبار وقالت إن مقاطع الفيديو التى شككت في البرنامج هي مقاطع مبدلجة.

يعني يا أكرم الهادي سليم ..كلو مدبلج في مدبلج.

الجاحات البتعمل فيها دي يا أكرم أكبر منك ..يبدو أن الأضواء انحسرت عن أكرم الهادي سليم فقال يطلع كدا على طريقة رامز جلال.

يا عم روح.

 

حوار من طرف واحد 

لمن أشوف (ضفر) بلعب قدام في المريخ ..أقول والله (تراوري) دا عمل عملية في المريخ...إبليس ما عملها.

لمن أشوف (ضفر) بلعب في المقدمة ..أقول المريخاب ديل ليهم حق يتخلعوا الخلعة دي كلها بي (بكري المدينة).

نحن لو كان عندنا لاعب زي (ضفر) في الهلال ..كان شفنا بكري المدينة (ميسي).

 اتجاه واحد 

الموية قاطعة.

والكهربة قاطعة.

الجماعة ديل فهموا (الامساك) غلط.

 

سواق قندران 

سواق قندران دخل ليه في (حيطة).

الحطية قامت تاني يوم تتكلم عن (حقوق الإنسان).

الدخل الحيطة في حقوق الإنسان شنو؟.

 

بدال عجلة 

يا بكري المدينة – اسمع الكلام دا ..حلاقتك دي ما حلاقة (مجموعات).

حلاقتك دي حلاقة سيكافا.

ناس لوزان لو شافوا الحلاقة دي مع الإيقاف بوقفوا معاك (ضفر).

الحركات دي ..والحلاقات دي ..حركات ضفر.

 

حاجة حريصة 

حاجة حريصة وقفت في باب الشارع – وقالت الموية بقت تجينا مع (السحور).

حاجة حريصة قالت ح تمشي لي ناس الموية في الولاية وتقول ليهم وقت بتجيبوا الموية في السحور ..طعّموها معاكم فد مرة.

 

علي تفتيحة 

علي تفتيحة قالوا ليه العيد السنة دي يا يوم السبت يا يوم الجمعة ...قال ليهم إن شاء الله يطلع يوم الأحد ...عشان عندي (ستائر) ما بعتها لغاية الآن.

 

صينية باسطة 

طبعاً منتظرين صينية الباسطة ..التى عودتكم عليها ..الباسطة خليناها لي عمود بكره بعد مباراة اليوم إن شاء الله.

بس يا جماعة ما تتكلوا لي على (الباسطة)...اعملوا فطوركم وعشاكم وسحوركم بي طريقتكم.