بدون حجاب - مافي جديد .. والدنيا عيد !

من اول مباراة لاخر مباراة .. مافي جديد . نفس الملامح والشبه والمشية زاتا وقدلتا .. الكورة فوووق في الشبكة ... في التمانية هناااك .. تختلف الاسماء والهدف واحد من الحضري لرمزي لجمال اجانب بالكوم والاقوان بالكوم .. من مهند الطاهر لشيبولا .. القدم يسري والتهديف من خارج المنطقة .. من بويا لشيبولا .. القدم يسري والشباك حمراء .. المريخ يتقدم والهلال يعود .. من روبيرو وعلاء الدين بابكر لشيبولا وسادومبا .. سادومبا زاتو ما في جديد .. كم مرة وكم حكي لينا القصة دي .. مافي جديد .. مرات بلعب باص ومرات بشوت من بعييد .. الفيلم ده دخلناه قبل كده و مافي جديد .. حتي جمال ياهو جمال قالوا سالم برضو تاني طلع ما سالم وجمال ياهو جمال .. والي ومغلوب طوالي !!

• انا من قالوا جمال رجع تاني عرفت القصة دي راجعة تاني .. الزول ده زولنا وبنعرفوا .. ياخي ده خمسة سنين ما شال دوري .. شال كمية من الاقوان في ضهرو لحدي ما استقال من كترة الحمل !! مما قال جاي راجع انا عرفت الحكاية دي بترجع والكورة كمان في المقبرة .. جمال ما ضاق انتصار في الدوري في استاد الهلال !! ياخي زولنا ده كترت ما ضامننو انا كتبت العمود قبل الكورة تبدا !!! وكمان معاهو متوكل ونادر مالك وعبد الـله حسن عيسي .. ياها القصة زاتا وياها الفرقت ريده وثيق رباطا .. واغالط نفسي في اصرار واقول امكن انا الما جيبت .. مافي جديد .. شنو يعني مزمل ناطق رسمي .. ما اصلا هو كان ناطق رسمي والمريخ مغلوب .. يعني ممكن نقول المريخ مغلوب رسمي مع الناطق الرسمي برضو عادي ما اصلا الدوري رسمي يا ناطق يا رسمي .. دي هسة حتنطقها كيف بالرسمي .. الهلال يهزم المريخ رسميا بهدفين (الرسميا يهزم الهدفين بمليخ ) كبكه شديدة من الزعل .. زي ماذدا زعلان في الاستديو زعل عجيب .. يتمتم ساااي .. مبروك ساكت ما قادر يقولها لكن اقول ليكم حاجة احسن من مصطفي النقر .. الاستديو كلو ينتقد في تغطية دفاع المريخ .. زي التقول ما عايز شيبولا يجيب القون والغريبة عمر النقي يشيل ويسأل في اخطاء الدفاع .. انتو لو مافي اخطاء يا النقر كان جبت قونك في بريمة وفرحت ونططت ! ليه يا عمر وانت دكتور واستاذ في الاعلام تتجاهل فرحة فوز الهلال والاداء الجميل وحق الجماهير في الفرحة .. لماذا تركيز الاستديو التحليلي كله علي الاخطاء .. نحن جبنا مصعب عمر ده من بيتو عشان يكرر لينا ضربات الجزاء .. وماذدا يقول نفس الاخطاء .. ما انت زاتك نفس الاخطاء .. السودان اتغلب كم مرة تلاتة يا ماذدا تلاتات وانت صوت لاسامة عطا المنان كم مرة .. عشان كده نحن بنقول ما في جديد .. اول مباراة هزمنا المريخ اربعة واخر مرة مباراة هزمنا المريخ اتنين ..عااادي جدا .. مافي جديد والدنيا عيد .. من هنا للعيد تاني التراويح الا تصلوها في البيت ! الكاردينال قال ليكم العيد عيدين .. نديكم عيد ونشيل عيد .. والـله نحن حندي عيد للجنة التسيير .. مساكين شلتوهم ساكت .. يعني الفرق شنو .كانوا حيتغلبوا عشرة يعني !! قائمين وقاعدين وجننتو الوزير جن .. اليسع ده ما قدر ينوم .. اليسع عذب المريخ .. اليسع ضيع المريخ .. شيل لينا ونسي .. رجع لينا جمال .. اها ونسي مشي وجمال رجع .. الحصل شنو .. شلتو المعلوم ومشيتو علي النوم .. نمتو ؟ ما اظن .. تصحوا للصباح ..سهر شديد .. بختك يا الرشيد الطاهر .. هسة كانوا قالوا قون شيبولا ده غلطتك انت .. مع انك شاطر في الحساب اكتر منهم .. لما انت كنت موجود الفارق كان سبعة نقاط ولما هم جو الفارق بقي عشرة نقاط .. ده طبعا غير الـ150 الف دولار الجابها جمال وشالها اسامة .. برضو مافي جديد . بكرة جمال يعلن سيكافا واسامة يقطع تذاكر والدولارات تروح شمار في مرقه .. مافي جديد .. يا خالد يا ثقيل انت ما شايف في شئ جديد ؟ ايوه ما شايف شئ جديد .. كيف مافي شئ جديد .. في شئ بولا ! وشي كسرة .. وشي قون من بره .. وشي ضربة جزاء .. شئ ده جانا من اهلو شي بولا بس . هسة بقي اي شئ ..وانا عندو زول بقي كل شئ ..

• في شئ عايز اقولو لحدي ما ارجع ليكم بكره عشان الاعلان نص صفحة .. عايز اقول شكرا لحكم اللقاء .. شكرا للشجاعة والهدوء والثقة .. شكرا لنيالا التي انجبتك .. شكرا لكل هذا الاداء وسط كل هذه الضغوطات .. شكرا فقد شرفت التحكيم السوداني .. تستحق ان تكون نجم المباراة !

• نقيف هنا ولا عندكم شئ .. بولا !!!!!!!